Հայաստանում խորհուրդ է տրվում ներդնել էլեկտրոնային երթուղային ծառայություն

Փետրվարի 8-ին հրավիրված Ազգային ժողովի հերթական նիստում առաջին ընթերցմամբ քննարկվեց «Ավտոմոբիլային տրանսպորտի մասին" ՀՀ օրենքում փոփոխություններ եւ լրացումներ կատարելու մասին» եւ «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» կառավարության հեղինակած նախագծերի փաթեթը:

ՀՀ տարածքային կառավարման և ենթակառուցվածքների փոխնախարար Արմեն Սիմոնյանը մանրամասն անդրադարձել է նիստի օրակարգին։

Գործադիր մարմինը, մասնավորապես, առաջարկում է սահմանել «Ուղեգծային (երթուղային) թերթ» հասկացությունը, որի վրա երթուղու սպասարկման իրավունք տրամադրող լիազորված մարմնի համապատասխան նշումը թույլ կտա ապահովել երթուղային ծառայությունների պատշաճ որակը:

Օրենքը նաեւ սահմանում է «էլեկտրոնային երթուղային ծառայություն» հասկացությունը, որի ներդրումը թույլ կտա կազմակերպել փոխադրման գործընթացը եւ վերահսկողություն իրականացնել միասնական էլեկտրոնային տեղեկատվական համակարգի միջոցով:

Հիմնական զեկուցողը տեղեկացրեց, որ հարցի արդիականության հետ կապված որոշում է ընդունվել օրենսդրական փաթեթի երկրորդ ընթերցմամբ քննարկումը կազմակերպել առաջին ընթերցմամբ ընդունվելուց հետո 24 ժամվա ընթացքում:

ՔՊ-ական պատգամավոր Հովիկ Աղազարյանը ներկայացրեց տնտեսական հարցերի մշտական հանձնաժողովի դրական եզրակացությունը: