ԱԳ նախարարը խնդիր չի տեսնում Անթալիայում դիվանագիտական համաժողովին մասնակցելու հարցում

Հայաստանի ԱԳՆ-ն դեռեւս որոշում չի կայացրել Անթալիայում կայանալիք դիվանագիտական համաժողովին մասնակցելու վերաբերյալ: Այդ մասին փետրվարի 2-ին Ավստրիայի եվրոպական և միջազգային հարցերի դաշնային նախարար Ալեքսանդր Շալենբերգի հետ համատեղ մամուլի ասուլիսի ժամանակ հայտարարել է գերատեսչության ղեկավար Արարատ Միրզոյանը:

Նրա խոսքով, դեռևս վերջնական որոշում չկա, հարցը քննարկվում է: «Ես և պարոն Ռուբինյանը (խորհրդարանի փոխխոսնակ և Թուրքիայի հետ երկխոսության հարցերով Հայաստանի հատուկ ներկայացուցիչ Ռուբեն Ռուբինյան - խմբ) ստացել ենք հրավեր մասնակցել համաժողովին։ Հայաստանի ԱԳՆ-ն այս մասով դեռ որոշում չի կայացրել, հարցը քննարկվում է»,- հայտնել է նա:

Ընդ որում, նա հավելել է, որ համաժողովը չպետք է դիտարկել երկկողմ համատեքստում։ «Սա միջազգային դիվանագիտական իրադարձություն է, որին Հայաստանը կարող է եւ որոշել մասնակցել։ Ես ոչ միայն խնդիրներ չեմ տեսնում, այլ նաեւ կարծում եմ, որ եթե նրան կապենք Հայաստանի եւ Թուրքիայի միջեւ երկխոսության հետ, ապա դա դրական երանգներից բացի ոչինչ չի տա», - նշել է Միրզոյանը։

Հունվարի 20-ին Թուրքիայի արտաքին քաղաքական գերատեսչության ղեկավարը հայտնել էր, որ Հայաստանը հրավիրվել է Անթալիայի դիվանագիտական ֆորումին։

Նույն օրը Հայաստանի արտգործնախարարությունից փոխանցեցին, որ ստացել են ֆորումին մասնակցելու հրավերը, և քննարկվում է միջոցառմանը նախարար Արարատ Միրզոյանի մասնակցության նպատակահարմարությունը։

Մի քանի օր անց էլ վարչապետ Նիկոլ Փաշինյանն առցանց ասուլիսի ժամանակ հայտարարեց՝ հավանականությունը մեծ է, որ Հայաստանը կընդունի Անթալիայի ֆորումին մասնակցելու Թուրքիայի հրավերը։