Թեհրանը Եվրոպային կոչ է արել արագացնել Իրանի հետ հաշվարկների մեխանիզմի` INSTEX-ի գործարկման ուղղությամբ աշխատանքները, որը նախատեսված է ԱՄՆ-ի պատժամիջոցները շրջանցելու համար: Այդ մասին հայտարարել է Իրանի ԱԳՆ պաշտոնական ներկայացուցիչ Բահրամ Ղասեմին:
Նա նշել է, որ ԱՄՆ-ը շարունակում է այդ հարցում ճնշում գործադրել Եվրոպայի վրա: «Բացառությամբ այդ մեխանիզմի գրանցման, մենք Եվրոպայի կողմից այլ կարևոր ձեռքբերումներ չենք տեսել»,- ասել է Իրանի ԱԳՆ պաշտոնական ներկայացուցիչը` նշելով, որ Թեհրանը Եվրոպայից ակնկալում է մեխանիզմի` հնարավորինս արագ իրականացում:
«Չնայած INSTEX-ը արդեն պաշտոնապես գրանցվել է, առայժմ որևէ լուրջ հաջողություն չկա: Մենք հասկանում ենք, որ այդ կազմակերպության գրանցումը առաջին քայլն էր, բայցևայնպես ակնհայտ է, որ գործընթացը դանդաղում է: Մենք խնդրում ենք եվրոպական պետություններին գործնական քայլեր ձեռնարկել վճարումների մեխանիզմի աշխատանքի մեկնարկն ապահովելու համար», - նշել է Իրանի ԱԳՆ խոսնակը` հավելելով․ - «Թեհրանը անվերջ սպասել չի կարող»:
Մեծ Բրիտանիայի, Ֆրանսիայի և Գերմանիայի նախաձեռնությամբ ստեղծված INSTEX-ի նպատակը Իրանի դեմ ամերիկյան պատժամիջոցների շրջանցումն ու Թեհրանի հետ կնքվող գործարքների համար այլընտրանքային վճարումների համակարգի ստեղծումն է: Այս խնդիրը հրատապ դարձավ այն բանից հետո, երբ արգելափակվեց իրանական բանկերի աշխատանքը միջազգային վճարումների SWIFT համակարգի շրջանակներում:
Այն բանից հետո, երբ Միացյալ Նահանգները հայտարարեց իրանական միջուկային գործարքից դուրս գալու եւ Թեհրանի դեմ պատժամիջոցների վերականգնման մասին, Վաշինգտոնը նախազգուշացրեց, որ կարող են լինել նոր սահմանափակիչ միջոցներ, որոնք կվերաբերեն Եվրոպայի՝ Իրանի հետ համագործակցող ընկերություններին:
Եվրամիությունը վերջին շրջանում քննարկում է նաեւ այն երկրներին օգնություն ցույց տալու հարցը, որոնք կտուժեն Իրանի հետ իր համագործակցության պատճառով ԱՄՆ-ի սահմանած պատժամիջոցներից: Այս մասին ասել էր Ֆրանսիայի Էկոնոմիկայի եւ ֆինանսների նախարար Բրյունո Լը Մերին։
«Թույլ կտա՞նք արդյոք ԱՄՆ-ին լինել ամբողջ աշխարհի տնտեսական ոստիկանը: Պաստասխանն է՝ ոչ»,- հայտարարել էր Լը Մերը: Նրա խոսքով՝ 1996 թվականի համաձայնագիրը Եվրամիությանը թույլ կտա ստանձնել այն բոլոր ծախսերը, որոնք ընկնում են Եվրոպայի՝ ամերիկյան պատժամիջոցների ներքո հայտնված ընկերությունների վրա:
