Այս պահին Բարգավաճ Հայաստան կուսակցության նախագահ Գագիկ Ծառուկյանը ԱԱԾ֊ում հարցաքննվում է, իսկ ԲՀԿ-ականներն ու նրանց կողմնակիցները բողոքի ակցիա են իրականացնում ԱԱԾ շենքի դիմաց: Կան տասնյակ բերման ենթարկվածներ:Այստեղ են նաև ԲՀԿ Երևանի ավագանու անդամները, սակայն Լյուդմիլա Սարգսյանը չի միացել իր թիմակիցներին:VERELQ-ը հիշեցնում է, որ Լյուդմիլա Սարգսյանը ԲՀԿ֊ական չէ, սակայն ԲՀԿ ավագանու անդամ է: Բացի այս, նրա դուստրը ԱԺ Իմ քայլը խմբակցության քարտուղար Հակոբ Սիմիդյանի կինն է: Հետևապես VERELQ-ը դիմեց տիկին Սարգսյանին պարզելու, թե ի՞նչն է պատճառը, որ նա այս պահին ԲՀԿ֊ի կողքին չէ:-Տիկին Սարգսյան, այս րոպեներին Ձեր գործընկերները բողոքի ակցիա են իրականացնում, այդ թվում և Երևանի ավագանու անդամները: Սակայն Դուք կարծես թե չկաք: Ինչպե՞ս եք գնահատում ստեղծված իրավիճակը:-Ես ցավալի եմ համարում այն իրավիճակը, որ այսօր տիրում է երկրում: Եվ ցավում եմ, որ Բարգավաճ Հայաստանը այս իրավիճակում է հայտնվել: Ավելացնել շատ բան չեմ ուզում:-Իսկ չե՞ք պատրաստվում միանալ Ձեր գործընկերներին:-Նախ, ես այն տարիքային խմբում եմ, որ բավականին խոցելի եմ կորոնավիրուսից: Երկրորդ․ ես հրավիրված չեմ եղել այն հավաքին, որտեղ պարոն Ծառուկյանը հայտարարությամբ է հանդես եկել՝ հավանաբար համարել են, որ ես կուսակցական չեմ և պետք է այնտեղ չլինեմ: (Ի դեպ, այդ հավաքին մասնակցել են ոչ միայն կուսակցական գործիչները ֊ խմբ․): Նույն տրամաբանությամբ ու կորոնավիրուսի խնդրով պայմանավորված ես այնտեղ չեմ: Բայց ես իմ զորակցությունն եմ հայտնում իմ գործընկերներին ու Բարգավաճ Հայաստան կուսակցությանը:-Կարո՞ղ ենք ենթադրել, որ Դուք հնարավոր է մանդատից հրաժարվեք․․․-Դա կորոշի ԲՀԿ֊ն: Քաղաքապետարանի հետ կապված խնդիրներում ես որևէ տարաձայնություն չունեմ Բարգավաճ Հայաստան կուսակցության հետ:-Իսկ ընտանիքում՝ հաշվի առնելով Հակոբ Սիմիդյանի գործոնը:-Դա ոչ մի կապ չունի իմ անձնական որոշումների հետ: Ես քաղաքական գործիչ եմ, ես եմ որոշում ինչ հակակրանք կամ համակրանք ունենամ կոնկրետ քաղաքական ուժի նկատմամբ և վերջին հաշվով ես նոր մարդ չեմ քաղաքականության մեջ: Հիմա պասիվ դիրքերում եմ, բայց իմ որոշումները միշտ ես եմ կայացնում՝ հենվելով երկրի համար առաջնություններով ու երկրի առաջ ծառացած խնդիրներով:
