Գագիկ Ծառուկյան. ժողովուրդը կպարտադրի իշխանափոխություն
«Մենք պատրաստավում ենք (հերթական) ընտրությունների, սակայն եթե իշխանությունները չընդունեն առաջարկված տարբերակները երկիրը ստեղծված ծանր սոցիալ-տնտեսական իրավիճակից դուրս բերելու համար, ապա ժողովրդին մնում է մեկ քայլ՝ պարտադրել արտահերթ նախագահական և խորհրդարանական ընտրություններ», - հայտարարել է «Բարգավաճ Հայաստան» կուսակցության (ԲՀԿ) նախագահ Գագիկ Ծառուկյանը:
ԲՀԿ առաջնորդը ծավալուն ելույթով հանդես եկավ իր իսկ կողմից նախաձեռնած ոչ իշխանական քաղաքական-հասարակական ուժերի խորհրդաժողովի ժամանակ, որը մեկնարկեց փետրվարի 5-ին: Նա սուր քննադատության ենթարկեց իշխանություններն քաղաքական մենաշնորհի և ծանր սոցիալ-տնտեսական իրավիճակի համար: Միևնույն ժամանակ իր ելույթում նա մի քանի անգամ շեշտեց, որ «մենք պատրաստվում ենք ընտրությունների»՝ ակնարկելով ամենայն հավանականությամբ հերթական ընտրությունները:
Խոսքի ավարտին միայն նա ասաց, որ եթե իշխանությունները չգնան զիջումների, ժողովորդը կպարտադրի արտահերթ ընտրություններ: Նրա կարծիքով քաղաքական իրադարձությունները Հայաստանում կընթանան իրենց հունով, եթե իշխանությունները ընդունեն ներկայացված առաջարկությունները:
«Եթե իշխանությունները ընտրում են առաջարկող տարբերակները մերժելու ճանապարհը, ապա ժողովուրդը ունենում է մեկ քայլ՝ պարտադրել արտահերթ նախագահական և խորհրդարանական ընտրություններ: Մարդիկ պետք է հիշեն, որ ոչ մի պաշտոն հավերժ չէ, և եթե պետության զարգացումը, պետության անվտանգությունը պահանջում է իշխանության փոփոխություն, ուրեմն այդպես էլ պետք է լինի: Ֆուտբոլային լեզվով ասած՝ գնդակը գտնվում է իշխանության դաշտում, սակայն քայլերի համար ժամկետը անսահմանափակ չէ», - հայտարարեց ԲՀԿ առաջնորդը, միևնույն ժամանակ չմանրամասնելով, թե երբ է իշխանությանը ներկայացված առաջարկությունների ընդունման վերջնաժամկետը:
Շարունակելով իր միտքը՝ Ծառուկյանն ընդգծեց, որ ծանր սոցիալական վիճակը լցրել է մարդկանց համբերության բաժակը: «Այս ամենից պետք է հետևություններ անի իշխող Հանրապետական կուսակցությունը», - նշեց նա՝ հավելելով, որ առաջիկայում խոշոր հանրահավաքներ են լինելու մարզերում և «համապետական հզոր հանրահավաք Երևանում»: Նրա պնդմամբ, ժողովրդի պահանջը պետք է լինի հրամայական «բոլորիս համար»:
ԲՀԿ լիդերը կարծում է, որ վերջին շրջանի մի շարք իրադարձություններ, այդ թվում՝ Գյումրիի ողբերգությունը, սահմանային ընդհարումների հաճախացումը, "անտանելի" գնաճը, ֆինանսական շուկայի անկայունություններն այն վերջին կաթիլներն էին, որոնք պետք է հուշեն իշխանություններին, որ «ժողովուրդը կանգնած է հզոր պոռթկման շեմին»: «Մեկ անզգույշ քայլ, նույնիսկ մեկ անզգույշ բառ կարող է հարյուր հազարավոր մարդկանց հանել փողոց, և ոչ ոք չի կարող ասել, թե ինչ կլինի արդյունքում: Մի բան հստակ է՝ դա կլինի անկառավարելի, հզոր ալիք», - հայտարարեց նա:
Հանրահավաքների անցկացման ժամկետների մասին Գագիկ Ծառուկյանը տեղեկություն չհաղորդեց: Լրագրողների հետ կարճ զրույցում նա ուղղակի նշեց, որ շուտով հանդիպելու է Լևոն Տեր-Պետրոսյանի և Րաֆֆի Հովհաննիսյանի հետ, ինչից հետո ամեն ինչ ավելի կհստակեցվի: Նա նաև խուսափեց պատասխանել այն հարցին, թե ինչու չի պահանջում ՀՀ նախագահ Սերժ Սարգսյանի հրաժարականը՝ հորդորելով չշտապել: «Մի շտապեք, ամեն ինչ՝ ժամանակին: Բոլոր հարցերին կպատասխանեմ», - հավաստեց նա:
