Հունահռոմեական ոճի օլիմպիական չեմպիոն Արթուր Ալեքսանյանը` «Ճերմակ արջը», չնայած վնասվածքին, մտադիր է այսօր պայքարել աշխարհի չեմպիոնի տիտղոսի համար: Այս մասին Facebook-ի իր էջում գրել է Ազգային ժողովի գիտության, կրթության, մշակույթի, սփյուռքի, սպորտի և երիտասարդության հարցերի մշտական հանձնաժողովի նախագահ Մխիթար Հայրապետյանը։ «Քիչ առաջ հեռախոսազրույց ունեցա Արթուր Ալեքսանյանի հետ։ Արթուրը ծանր վնասվածք է ստացել, սակայն ինձ համար բացարձակապես զարմանալի չէ, որ մեր ըմբիշը մարտական է տրամադրված և մտադիր է գոտեմարտել աշխարհի չեմպիոնի կոչման համար: Վերջնական որոշումն Արթուրը կկայացնի այսօր՝ բժիշկների հետ խորհրդակցությունից հետո»,–գրել է նա։ Հիշեցնենք` Արթուր Ալեքսանյանը վնասվածք էր ստացել Ղազախստանում ընթացող ԱԱ-ի կիսաեզրափակչում։ Նախօրեին Մխիթար Հայրապետյանը հայտնել էր, որ վերջին գոտեմարտի ընթացքում Արթուրի կողն էր կոտրվել, ինչը խանգարում էր շնչելուն ու, բնականաբար, իր լավագույն որակները ցուցադրելուն: Երեկ Ալեքսանյանը Ըմբշամարտի աշխարհի առաջնության կիսաեզրափակիչ գոտեմարտում 3:1 հաշվով պարտության մատնեց վրացի ըմբիշ Գեորգի Մելիային: Արթուր Ալեքսանյանը դարձավ Եվրոպական խաղերի չեմպիոն Եզրափակչում Արթուրի մրցակիցը կլինի Ռուսաստանը ներկայացնող, այս քաշային կարգում աշխարհի գործող չեմպիոն Մուսա Եվլոևը։ Ըմբշամարտի աշխարհի առաջնության եզրափակիչ փուլը կկայանա այսօր։
