Առավոտյան ժամը 08:00-ից Երևանի տարբեր հատվածներում անհնազանդության ակցիաներ են մեկնարկել: Քաղաքացիները փակում են փողոցները, այդ կերպ իրենց բողոքն արտահայտելով ՀՀ իշխանությունների դեմ, ինչպես նաև Արցախն Ադրբեջանին հանձնելու դեմ: Ոստիկանությունը շարունակ բերման է ենթարկում քաղաքացիներին՝ այս պահին հայտնի է մոտ 150 բերման ենթարկվածների մասին: Նրանց թվում են ոչ միայն ուսանողներ, քաղաքացիներ, այդ թվում տարեց, մտավորականներ ու լրագրողներ, այլև ԱԺ պատգամավորներ: Մասնավորապես, փաստաբան Արսեն Բաբայանը հայտնում է ԱԺ "Հայաստան" խմբակցության պատգամավոր Թադևոս Ավետիսյանի ձերբակալության մասին. "Քիչ առաջ ոստիկանները ձերբակալեցին ՀՀ ԱԺ պատգամավոր Թադևոս Ավետիսյանին:Եթե չհիմնավորեն, որ Թադևոս Ավետիսյանը կատարում էր առերևույթ հանցագործություն և նրան ձերբակալել են անմիջականորեն ծագած հիմնավոր կասկածի հիմքով, ապա ձերբակալողները, նրանց այդպիսի հրաման տվողները պետք է ենթարկվեն քրեական պատաախանատվության",- գրել է Բաբայանը: Ակցիաներն ու ձերբակալությունները շարունակվում են: Իրավիճակը Երևանում շարունակում է մնալ լարված:
