Ադրբեջանի պաշտպանական արդյունաբերության նախարարությունը (ՊԱՆ) ներկայացրել է «Tufan» զրահամեքենան, որը համապատասխանում է ՆԱՏՕ-ի չափանիշներին: «Զրահամեքենան ստեղծվել է ՊԱՆ Ազգային աէրոտիեզերական գործակալության կողմից և նախատեսված է մարտական պայմաններում զինվորականների փոխադրման համար: Զրահամեքենան պատասխանում է ՆԱՏՕ-ի «STANAG 4569» երրորդ մակարդակի պաշտպանության չափանիշներին», - ասել է գերատեսչության ղեկավարի խորհրդական Ազադ Մամեդովը։ Մամեդովն ընդգծել է, որ զրահամեքենայի դիզայնը մշակվել է ադրբեջանցի մասնագետների կողմից և արմատապես տարբերվում է իր անալոգներից: «Tufan զրահամեքենան համալրված է հեռահար կառավարման մոդուլով, հակատանկային կառավարվող հրթիռային համակարգով, ռադիոէլեկտրոնային համակարգով (РЭБ), 12,7 մմ տրամաչափի գնդացրով, լազերային հեռաչափով և ջերմացույց տեսանկարահանող սարքերով», - ասել է Ազադ Մամեդովը: Նրա խոսքով, փորձարկումից հետո՝ ընթացիկ տարում կստեղծվի տվյալ զրահամեքենաների բժշկական, ոստիկանական և հետախուզական տարբերակները:
