Ահաբեկչությունը բացառված չէ. Իրանում Ուկրաինայի դեսպանատունը խմբագրել է իր իսկ տեքստը

Իրանում Ուկրաինայի դեսպանությունը փոխել է Թեհրանի մերձակայքում ինքնաթիռի կործանման վերաբերյալ հաղորդագրության տեքստը՝ դրանից հեռացնելով ահաբեկչության վարկածի բացառման վերաբերյալ տեղեկատվությունը:

Տեքստից հանվել է նաև շարժիչի վթարի մասին տողը: Ներկայումս հաղորդագրությունում ասվում է. «Ինքնաթիռի կործանման պատճառների վերաբերյալ տեղեկատվությունը քննվում է հանձնաժողովի կողմից: Նախքան հանձնաժողովի որոշումը, վթարի պատճառների վերաբերյալ բոլոր հայտարարությունները պաշտոնական բնույթ չեն կրում»:

Ավելի վաղ Իրանում Ուկրաինայի դեսպանությունը բացառել էր կործանված ինքնաթիռի նկատմամբ ահաբեկչության վարկածը.«Նախնական տեղեկատվության համաձայն ինքնաթիռը կործանվել է տեխնիկական պատճառներով շարժիչի վթարի հետևանքով: Ահաբեկչության վարկածը բացառված է»,- ասված էր հաղորդագրության սկզբնական տեքստում:

Հիշեցնենք, հունվարի 8-ին Թեհրանում կործանվել է Թեհրան-Կիև չվերթն իրակնացնող ուկրաինական ինքնաթիռ: Ըստ վերջին տվյալների՝ ինքնաթիռում եղել է 167 ուղևոր և անձնակազմի 9 անդամ: Որևէ մեկին փրկվել չի հաջողվել: