Բաքվին ավելի դժվար կլինի պայմանավորվել Փաշինյանի հետ, քան Սերժ Սարգսյանի հետ էր․ դե Վաալ

Քարնեգի հիմնադրամի փորձագետ Թոմաս դե Վաալը «Էխո Կավկազա» ռադիոկայանի հետ զրույցում անդրադարձել է Վիեննայում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի առաջին պաշտոնական բանակցություններին։

Բրիտանացի քաղաքագետը նշել է, որ ի տարբերություն ՀՀ պաշտոնաթող նախագահ Սերժ Սարգսյանի, Փաշինյանի հետ Բաքվին որոշ հարցերում ավելի դժվար կլինի համաձայնության հասնել, գրում է Պանարմենիանը։

Փորձագետը նախկինի պես չի հավատում, որ գործընթացում բեկում կլինի։ Միևնույն ժամանակ նա, հավելել է, որ կա դրական տեղաշարժ՝ մասնավորապես այն, որ առաջնագծում զգալի նվազել են կորուստները։

«Փաշինյանն անընդհատ նշում է, որ ինքը չի որոշելու, այլ նաև Արցախն է որոշելու, սա նշանակում է, որ նա Սարգսյանի նման ծայրահեղ դիրքորոշում չունի, որ միայն ինքն է որոշում կայացնողը», - ասել է դե Վաալը։

Ադրբեջանի նախագահ Իլհամ Ալիևը և Հայաստանի Հանրապետության վարչապետ Նիկոլ Փաշինյանը մարտի 29-ին առաջին անգամ ԵԱՀԿ Մինսկի խմբի համանախագահների (Իգոր Պոպով` Ռուսաստան, Էնդրյու Շոֆեր` ԱՄՆ, Ստեֆան Վիսկոնտի` Ֆրանսիա) հովանու ներքո հանդիպել են Վիեննայում։ Հանդիպմանը մասնակցեցին նաև արտգործնախարարներ Զոհրաբ Մնացականյանը և Էլմար Մամեդյարովը։ ԵԱՀԿ գործող նախագահի անձնական ներկայացուցիչ Անջեյ Կասպշիկը ևս ներկա էր հանդիպմանը։