Իսրայելական ընկերությունն Բաքվի հորդորով հարվածել է Արցախի դիրքերին. հարուցվել է քրգործ

Իսրայելի գլխավոր դատախազությունը դատարանում ապացույցներ կներկայացնի այն մասին, որ իսրայելական «Aeronautics Defense Systems» (ADS) ընկերության աշխատակիցները, Ադրբեջանում իրենց անօդաչուների փորձարկման ժամանակ մտադիր են եղել հարվածել Արցախում հայկական դիրքերին, հայտնում է անգլալեզու «The Times of Israel» պարբերականը:

Դատարանում պատասխանողի կարգավիճակով հանդես կգան ընկերության գլխավոր տնօրեն Ամոթ Մաթանը, նրա տեղակալ Մեիր Ռազմովիչը, զարգացման գծով տնօրեն Հաիմ Հիվաշարն ու մարքեթինգի տնօրեն Դեյվիդ Գոլդենը:

Դատական հայցի հիմքում հետեւյալն է. 2017 թվականի աշնանը, Ադրբեջանի ԶՈՒ ներկայացուցիչները, նոր իսրայելական անօդաչուներ ձեռք բերելու մտադրությամբ, խնդրել են Ադրբեջան ժամանած «Aeronautics Defense Systems» աշխատակիցներին ցուցադրել Orbiter 1K կամիկաձե-դրոնների հնարավորությունները: Այդ նպատակով անօդաչուների օպերատորներին առաջարկել են հարվածներ հասցնել 2 երկրների սահմանագծում գտնվող հայկական դիրքերի ուղղությամբ: Արդյունքում, իսրայելցի օպերատորները հրաժարվել են կատարել խնդրանքը, փոխարենը ընկերության ղեկավարությունն է լիցքավորել դրոններն ու հենց իրենք են նշանառության առել առաջարկված դիրքերը: Դիրքերը խոցել նրանց չի հաջողվել, սակայն անօդաչուներից մեկն ընկել է Արցախում հայկական ԶՈՒ դիրքերից մեկից 100 մետր հեռավորության վրա:

Այժմ Իսրայելում հարուցվել է քրեական գործ՝ «Aeronautics Defense Systems» ընկերության դեմ՝ հայկական դիրքերի ուղղությամբ հարվածներ հասցնելու գործում ադրբեջանական կողմին աջակցելու համար: