Նոր կառավարության կազմում ներգրավված կլինի նաև «Ծառուկյան» դաշինքը. Փաշինյան

Նոր կառավարության կազմում ներգրավված կլինի նաև «Ծառուկյան» դաշինքը, իսկ Դաշնակցության հետ քննարկումները դեռ շարունակվում են: Այս մասին լրագրողներին հայտնեց ՀՀ վարչապետ Նիկոլ Փաշինյանը, որն այսօր վարեց իր կառավարության առաջին նիստը:

Նա հիշեցրեց, որ ձևավորվելու է համաձայնության կառավարություն, որում կադրային լավագույն լուծումներն են կիրառվելու:

«Ոչ թե կոալիցիոն կառավարություն, այլ համաձայնության կառավարություն», - ասաց նա՝ չմանրամասնելով, թե որ նախարարությունները կտրամադրվեն «Ծառուկյան» դաշինքին:

Նշենք, որ ըստ մամուլի՝ Գագիկ Ծառուկյանի թմին կհանձնվեն ՀՀ արտակարգ իրավիճակների, ՀՀ էներգետիկ եւ բնական ենթակառուցվածքների, ՀՀ տրանսպորտի, կապի եւ տեղեկատվական տեխնոլոգիաների եւ ՀՀ բնապահպանության նախարարությունները:  

Ինչ վերաբերում է արտահերթ խորհրդարանական ընտրությունների անցկացմանը, Փաշինյանը նշեց, որ դրանք պետք է անցկացվեն տրամաբանական ամենասեղմ ժամկետներում: