Նիկոլ Փաշինյանն ազատ արձակվեց

Նիկոլ Փաշինյանն ազատ արձակվեց Երևանի ձերբակալվածների պահման վայրից:

Քիչ առաջ այստեղ էր ՀՀ առաջին փոխվարչապետ Կարեն Կարապետյանը:

Նրա հետ դուրս եկան նաև պատգամավորներ Արարատ Միրզոյանն ու Սասուն Միքայելյանը:
Փաշինյանը հայտարարեց, որ երեկոյան հանրահավաքում կխոսի իր ու Կարեն Կարապետյանի հանդիպման մանրամասներից: Նաև նշեց, որ շարժման բոլոր մասնակիցները, որոնք ձերբակալված են, պետք է րոպե առաջ ազատ արձակվեն:

Փաշինյանը հայտարարեց, որ իրեն ազատ են արձակել, որովհետև Հայաստանում տեղի է ունեցել իշխանափոխություն և իշխանությունն այլևս հայ ժողովրդինն է:

Մի քանի րոպե անց նա արդեն Տիգրան Մեծ պողոտայում էր, որտեղ ընթանում է բազմահազարանոց երթ:

Քաղաքացիները իրեր հրմշտելով փորձում են նրան մոտենալ, նրանք վանկարկում են «Նի-կոլ», «Հաղթել ենք» փորձում գրկել նրան, ծափահարում են, ողջագորվում: