Լավրով. Պուտինը պատրաստ է Թրամփի հետ հանդիպել ԱԽՏՀ-ի շրջանակում

ՌԴ նախագահ Վլադիմիր Պուտինը պատրաստ է իր ամերիկացի գործընկեր Դոնալդ Թրամփի հետ հանդիպել Վիետնամում Ասիա-Խաղաղօվկիանոսյան տնտեսական համագործակցության գագաթնաժողովի շրջանակում: Այս մասին հայտնել է ՌԴ ԱԳ նախարար Սերգեյ Լավրովը, փոխանցում է «ՌԻԱ Նովոստի»-ն:

«Մենք լսում ենք Դոնալդ Թրամփի հայտարարությունները, որ նա ծրագրում է ՌԴ նախագահ Վլադիմիր Պուտինի հետ նման հանդիպում: Արարողակարգային ծառայությունները շփման մեջ են, եւ երբ առաջնորդների ժամանակացույցները վերջնականապես հստակեցվեն, կարծում եմ՝ ձեզ այդ մասին կհայտնեն»,- ասել է նա:

Նա նշել է նաեւ, որ իր հանդիպումը ԱՄՆ պետքարտուղար Ռեքս Թիլերսոնի հետ կարող է տեղի ունենալ նույն գագաթնաժողովի շրջանակում:

Լավրովը հայտնել է, որ ծրագրում է Թիլերսոնի հետ քննարկել երկկողմանի հարաբերությունները, որոնք «լուրջ վերանորոգում են պահանջում», ինչպես նաեւ Կորեական թերակղզու, Սիրիայի ճգնաժամի կարգավորման, Իրաքի, պաղեստինա-իսրայելական հակամարտության, Ուկրաինայի հարցերը»: