Ադրբեջանը փորձում է գրավել Արցախի Խրամորթ և Խնապատ գյուղերի միջև բարձունքը. մամուլ
Արցախի սահմանին վերջին օրերին տիրող լարված իրավիճակը ոչ այլ ինչ է, քան հակառակորդի հատուկ գործողություն: Այդ մասին գրում է «Հրապարակ» թերթը։
Թերթը հղում է անում Արցախի աղբյուրներին, որոնք հայտնում են, որ մի քանի օր է՝ հակառակորդը հատուկ գործողությունների միջոցով փորձում է գրավել Խրամորթ-Խնապատ գյուղերի միջև ընկած բարձունքը։
«Խոսքը Քարագլուխի բարձունքի մասին է, որի վրա վերահսկողություն ձեռք բերելով՝ հակառակորդը նշանառության տակ կվերցնի ամբողջ Ասկերանը, որից հետո Ստեփանակերտը գրավելը շատ ավելի հեշտ կլինի: Այդ իսկ պատճառով, արդեն մի քանի օր է, ինչ իրենց գյուղ են վերադառնում Խրամորթ գյուղի շատ բնակիչներ, որոնք ավելի վաղ տարհանվել էին։ Հակառակորդի պլանը ծրագիրը է, դատարկել գյուղերը, ապա մտնել եւ զբաղեցնել այդ բարձրունքը»,- ասվում է գրառման մեջ։
VERELQ-ը հիշեցնում է, որ վերջին մի քանի օրերին ադրբեջանական զինուժը խախտել է հրադադարի պահպանման ռեժիմը Արցախի Հանրապետության Ասկերանի շրջանի Խրամորթ գյուղի տարածքում։
Մարտի 10-ին իր տան բակում գյուղատնտեսական աշխատանքների ժամանակ հակառակորդի կրակոցից թիկունքից վիրավորվել է Խրամորթ գյուղի բնակիչ Սուրեն Բաղդասարյանը։
Ավելի վաղ ադրբեջանցի զինվորականները սպառնալիքներով (բարձրախոսով) փորձել են ստիպել Արցախի Ասկերանի շրջանի Խրամորթ գյուղի բնակիչներին լքել տները։