Ռուսաստանի արտաքին գործերի նախարար Սերգեյ Լավրովը Անկարայում հանդիպել է Թուրքիայի արտգործնախարար Հաքան Ֆիդանի հետ, հայտնել է ՌԴ ԱԳՆ-ն իր Telegram ալիքում։ Ռուս նախարարը Անկարա է ժամանել փետրվարի 23-ին։ Այցից մի քանի օր առաջ նա արդեն հանդիպել էր Ֆիդանի հետ՝ քննարկելով ՌԴ-ի և ԱՄՆ-ի միջև խորհրդակցությունների արդյունքները, Ուկրաինայի շուրջ բանակցային գործընթացը և Սիրիայի հարցը՝ թուրքական կողմի՝ ԱՄՆ-ի, ՌԴ-ի և Ուկրաինայի մասնակցությամբ ուկրաինական կարգավորման գագաթնաժողով անցկացնելու պատրաստակամության համատեքստում, գրում է РИА Новости-ն։ Բացի այդ, այցը տեղի է ունենում Մոսկվայի՝ Դամասկոսի նոր իշխանությունների հետ կապեր հաստատելու ձգտման ֆոնին։ Թուրքիան Բաշար Ասադի հեռանալուց հետո ավելի սերտ կապեր ունի սիրիական կողմի հետ։ Թուրքական լրատվամիջոցները հաղորդում են, որ հանդիպումներում քննարկվելու է գլխավորապես երկու հարց՝ Սիրիան և ռուս-ուկրաինական հակամարտությունը։ Թուրքական Hürriyet թերթի քաջատեղյակ աղբյուրը, հիշեցնելով 2022-ի մարտին ռուսական և ուկրաինական հակամարտող կողմերին Ստամբուլում հյուրընկալելու փաստը, նշել է, որ այս անգամ ևս Անկարան փորձելու է նման դեր ստանձնել կողմերի միջև։ Թուրքական կողմը նաև փորձելու է իր ներդրումն առաջարկել ԱՄՆ-ի և Ռուսաստանի միջև սկսված գործընթացում։ Փետրվարի 24-ին Թուրքիայի արտգործնախարար Հաքան Ֆիդանը, խոսելով Ուկրաինայի՝ ՆԱՏՕ-ի անդամ դառնալու հավանականության մասին, հայտարարել էր, որ ներկայում պետք է «շատ իրատես» լինել։Փետրվարի 18-ին պաշտոնական այցով Անկարա էր ժամանել նաև Ուկրաինայի նախագահ Վլադիմիր Զելենսկին։