Երևանը դիմում է Մոսկվային՝ կոչ անելով պաշտպանել Հայաստանի ինքնիշխան տարածքը. ԱԽ քարտուղար

Երևանը դիմում է Մոսկվային՝ կոչ անելով պաշտպանել Հայաստանի ինքնիշխան տարածքը՝ համաձայն 1997 թվականի երկկողմ պայմանագրի: Այդ մասին Հանրային հեռուստաալիքին տված հարցազրույցում հայտնել է ԱԽ քարտուղար Արմեն Գրիգորյանը՝ խոսելով հայկական դիրքերի ուղղությամբ ադրբեջանական զինուժի հարձակումների մասին:

«Քանի որ հարձակումը եղել է Հայաստանի սուվերեն տարածքի վրա, ապա մենք դիմում ենք ՌԴ-ին, ՀՀ և ՌԴ միջև գոյություն ունեցող 1997 թվականի պայմանագրի շրջանակներում ՀՀ տարածքային ամբողջականությունը պաշտպանելու կոչով», - ասել է ԱԽ քարտուղար Արմեն Գրիգորյանը՝ նշելով, որ սա բանավոր դիմում է, որն ունենալու է համապատասխան ընթացակարգային կիրառություն։

Նրա տվյալներով, այս պահին շարունակվում են մարտական գործողություններ ընթանալ Հայաստանի արևելյան սահմանին: «Մայիսի 12-ից սկսած Հայաստանի սուվերեն տարածքում գտնվում են Ադրբեջանի զինված ուժերը։ Այսօրվա սրացումը կախված Է նաև Ադրբեջանի կողմից հավելյալ զրահատեխնիկա և զինված ուժեր կիրառելու հետ», - ասել է նա։

Նա նաև նշել է, որ հայկական կողմից կան կարուստներ և վիրավորներ՝ հստակ չնշելով նրանց թիվը: «Այս պահին դեռևս հստակ չենք կարող խոսել կորուստների ստույգ թվի մասին, բայց կան վիրավորներ և կան կորուստներ», - ասել է նա։

Պաշտպանության նախարարության տվյալներով ժամը 14։30-ի դրությամբ իրադրությունը ՀՀ արևելյան սահմանագոտում շարունակում է ծայրահեղ լարված մնալ։

Ինչպես արդեն հաղորդվել էր, ադրբեջանական զինված ուժերի ստորաբաժանումները հերթական անգամ սադրանքի էին դիմել՝ հարձակում գործելով տվյալ ուղղությամբ տեղակայված հայկական դիրքերի վրա։

ՊՆ-ի հաղորդմամբ, ընթանում են տեղային մարտեր, որոնց ընթացքում հակառակորդը կիրառում է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ "Հայկական կողմից իրականացվում են համարժեք գործողություններ։ Իրադրությունը վերահսկվում է ՀՀ զինված ուժերի կողմից", - ասված է հայտարարության մեջ։