Ստեփանակերտում բացվել է ադրբեջանագիտության առաջին կենտրոնը

Արցախում բացվել է ադրբեջանագիտության առաջին կենտրոնը։ Այս մասին հայտնում է Genesis Armenia ուղեղային կենտրոնը։

«Genesis Armenia ուղեղային կենտրոնի ռազմավարական նշանակության նոր նախագիծն իրականություն դարձավ։ Կարո Կարապետյանի անվան կենտրոնը, որը զինված է արհեստավարժ ուսումնառության համար անհրաժեշտ տեխնիկայով ու գույքով, տեղակայված է Արցախի պետական համալսարանի շենքում:

Կենտրոնում առաջին փուլով մեկ տասնյակից ավելի արցախցի երիտասարդներ անվճար ադրբեջաներեն են սովորելու և Ադրբեջանի պատմությունն են ուսումնասիրելու։ Ծրագրի նպատակն է պատրաստել կրթված, իր ազգային-պետական շահերն ու թշնամուն լավ ճանաչող սերունդ։

Genesis Armenia-ի քաղաքականության հիմքում հայկական զույգ պետությունների ռազմաքաղաքական և անվտանգային մարտահրավերները հաղթահարելու նպատակներն են։ Կենտրոնն այս քաղաքականության շրջանակում պատրաստելու է ադրբեջաներենի մասնագետների, որոնք կկարողանան իրենց հմտությունները գործածել թուրք-ադրբեջանական տանդեմից եկող տեղեկատվական, քարոզչական և անվտանգային սպառնալիքների չեզոքացման գործում»,–նշված է հաղորդագրության մեջ։