Իրանը մտադիր է զենք գնել Ռուսաստանից

Իրանի զինված ուժերի գլխավոր շտաբի պետ, գեներալ-մայոր Մոհամմադ Հոսեյն Բաղերիի Մոսկվա այցի շրջանակներում կքննարկվեն Ռուսաստանից զենքի գնման հարցերը, հաղորդում է EADaily-ն:

Մոսկվա ժամանելուց հետո լրագրողների առջեւ ելույթ ունենալով՝ գեներալ-մայոր Բաղերին ասել է, որ իրանական նոր վարչակազմը հատուկ նշանակություն է տալիս Արեւելքին և Արեւելքի երկրներին: Նա ընդգծել է, որ Իրանի եւ Ռուսաստանի զինված ուժերը կամրապնդեն ռազմական համագործակցությունը:

Բաղերին հիշեցրել է, որ Իրանը Ռուսաստանի հետ զենքի գնման համաձայնագրեր է ստորագրել Թեհրանին զենքի մատակարարման ՄԱԿ-ի էմբարգոյի չեղարկումից հետո, ինչը կքննարկվի ներկա այցի ընթացքում: Գեներալի գնահատմամբ՝ վերջին տարիներին Ռուսաստանի Զինված ուժերի հետ Իրանի համագործակցությունն ակտիվացել է։

Աֆղանստանի իրադրությունը նույնպես կդառնա այն թեմաներից մեկը, որը կողմերը կքննարկեն այդ այցի ընթացքում, հայտարարել Է գեներալը:

Բաղերիի գլխավորած պատվիրակությունը Մոսկվա է ժամանել Ռուսաստանի Դաշնության պաշտպանության նախարար, բանակի գեներալ Սերգեյ Շոյգուի պաշտոնական հրավերով: Մոսկվայում Մոհամմադ Բաղերին կհանդիպի պաշտպանության նախարար Սերգեյ Շոյգուի եւ Ռուսաստանի զինված ուժերի գլխավոր շտաբի պետ Վալերի Գերասիմովի հետ:

Բանակցությունների օրակարգում կլինեն ռազմական ոլորտում համագործակցության ընդլայնման, ահաբեկչության դեմ պայքարի հետ կապված հարցեր: Զրուցակիցները նաեւ կքննարկեն տարածաշրջանային եւ միջազգային հրատապ գործընթացները:

Մինչ այդ, հոկտեմբերին, Մոհամմադ Բաղերին այցելել է Պակիստան, որտեղ նաեւ չորս օր բանակցություններ է վարել պակիստանի քաղաքական գործիչների և զինվորականների հետ: