Դաժան սպանություն Ջավախքում. ընտանիքի չորս անդամների դիերը հայտնաբերել են երկու օր անց

Վրաստանի Ախալքալաքի շրջանի Վաչիան գյուղում մահացած են գտել նույն ընտանիքի չորս անդամներին: Տանը հայտնաբերել են Խաչոտյան Վաղինակի ընտանիքի չորս անդամների` 37-ամյա կնոջը և երեք` 5, 16 և 18 ամյա երեխաների դիերը:

Նախնական տվյալներով մահացած մոր և երկու ավագ աղջիկներին մահացու հարված է հասցվել, իսկ կրտսեր երեխան խեղդված է: Ընտանիքի սպանության դեպքի առիթով կատարվում է հետաքննություն: Քննության արդյունքները դեռ չեն հրապարակված, իսկ իրավապահ մարմինները հրաժարվում են մեկնաբանությունից: Սակայն, ըստ նախնական տեղեկությունների, որը տարածել է Ռուսթավի 2 հեռուստաընկերությունը, մորը և 16 և 18 տարեկան աղջիկներին գլխի հատվածում բութ առարկայով հարված է հասցված: Կրտսեր երեխան խեղդված է եղել, հյատնում է jnews.ge կայքը:

Տեղացիների խոսքերով, մահացածների մարմնի վրա եղել են դանակի և այլ առարկայի հարվածի հետքեր:

Սպանվածների դիերը իրենց տանը հայտնաբերել են հարեւանները: Մահացածներին գտնելու պահին տան սեղան աթոռները շուռ տված են եղել, իսկ տունը մրոտված է եղել՝ հավանաբար բնական գազի, և իրերի մասնակի այրումից առաջացած:

«Ընտանիքի հայրը ամիսներ առաջ մեկնել էր Ռուսաստան՝ արտագնա աշխատանքի, այստեղ ապրում էր նրա ընտանիքը: Ըստ տարածված տեղեկությունների` ընտանիքի չորս անդամներին սպանել են: Դիերը հայտնաբերվել են պատահաբար, երբ հարևանը տարօրինակ հոտ է զգացել և քայլել այդ ուղղությամբ»,- ասել է Տեղի բնակիչներից Ռուզաննա Ս.-ն: