Սուրբ Սոֆիա տաճարը մեկ ամսով կվերածվի մզկիթի

Առաջիկա մեկ ամսվա ընթացքում՝ Ռամադանի ժամանակ, Ստամբուլում գտնվող Սուրբ Սոֆիա տաճարը կվերածվի մզկիթի: Նախօրեին այստեղ արդեն առավոտյան աղոթք են կարդացել, և մինչև հուլիսի 7-ը ամեն առավոտ հանրային հեռուստաընկերությունը ուղիղ միացմամբ կհեռարձակի առավոտյան աղոթքը:

Էրդողանը առաջին անգամ չէ, որ բարձրացնում է Սուրբ Սոֆիային մզկիթի կարգավիճակ վերադարձնելու հարցին: Տաճարը ժամանակավորապես մզկիթի կարգավիճակ վերադարձնելը շատերը կապում են Գերմանիայի Բունդեսթագի կողմից Հայոց Ցեղասպանության ճանաչման փաստի հետ: Առայժմ հայտնի չէ, թե Ռամադանից հետո ինչ կարգավիճակ կունենա պատմամշակութային այս կոթողը:

Հիշեցնենք, 1453 թվականին Բյուզանդական կայսրության ու Կոստանդնուպոլսի անկումից հետո Սուրբ Սոֆիան վերածվեց մզկիթի, սակայն 1934 թվականին այն Թուրքիայի Հանրապետության հիմնադիր Մուսթաֆա Քեմալ Աթաթուրքի հրամանով վերածվեց թանգարանի: 1985 թվականից տաճարը ներառված է UNESCO-ի Համաշխարհային ժառանգության ցանկում: