ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) ապրիլի 13-ին հանդես են եկել հայտարարությամբ, որը ներկայացված է ստորև։
Համանախագահները գոհունակությամբ արձանագրում են հրադադարի ամրապնդումն ու ուշադիր հետևում են 2020թ․ նոյեմբերի 9-ին կողմերի միջև հաստատված համաձայնության իրագործմանը։ Համանախագահները ողջունում են զոհվածների աճյունների վերադարձի հարցում առաջընթացը և հակամարտության արդյունքում տեղահանվածների վերաբնակեցման, մարդասիրական օգնության ու ապրելու պատշաճ պայմանների ապահովման, ինչպես նաև տարածաշրջանում տրանսպորտային ու հաղորդակցության ուղիների ապաշրջափակմանն ուղղված կառուցողական քննարկումների հարցում գրանցվող շարունակական առաջընթացը։
Համանախագահները կողմերին հիշեցնում են, որ անհրաժեշտ է հավելյալ ջանքեր գործադրել՝ լուծելու մնացած խնդրահարույց հարցերը և ստեղծելու փոխվստահության մթնոլորտ, որը կտանի հարատև խաղաղության։
Այդ հարցերի թվում են՝ ռազմագերիների և այլ պահվող անձանց վերադարձը՝ միջազգային մարդասիրական իրավունքին համապատասխան, տեղեկատվության փոխանակումը, որն անհրաժեշտ է հակամարտության շրջանների արդյունավետ ականազերծման համար, Լեռնային Ղարաբաղ մուտքի սահմանափակումների վերացումը, այդ թվում՝ միջազգային մարդասիրական կազմակերպությունների ներկայացուցիչների համար և կրոնական ու մշակութային ժառանգության պահպանումն ու պաշտպանությունը, ինչպես նաև հակամարտության արդյունքում տուժած համայնքների միջև ուղիղ շփումների խթանումը։
Հաշվի առնելով ԵԱՀԿ-ի իրենց մանդատի պայմաններն ու տարածաշրջանի ժողովուրդների՝ կայուն, խաղաղ և բարեկեցիկ ապագա ունենալու ձգտումը՝ համանախագահները շեշտում են, որ հատուկ ուշադրություն է պետք դարձնել վերջնական համապարփակ և կայուն կարգավորման հասնելուն՝ տարրերի ու սկզբունքների հիման վրա, որոնք քաջ հայտնի են կողմերին։
Համանախագահները կոչ են անում կողմերին առաջին իսկ հնարավորության դեպքում վերսկսել բարձր մակարդակի քաղաքական երկխոսությունը՝ համանախագահների հովանու ներքո։
Համանախագահները վերահաստատում են իրենց առաջարկը՝ իրենց հովանու ներքո կազմակերպելու երկկողմ խորհրդակցություններ, որպեսզի կողմերը վերանայեն և համաձայնության գան կառուցվածքային օրակարգի շուրջ, որում կարտացոլվեն իրենց առաջնահերթությունները՝ առանց նախապայմանների։
Համանախագահներն ընդգծում են իրենց պատրաստակամությունը վերսկսելու իրենց տարածաշրջանային այցերը, այդ թվում՝ Լեռնային Ղարաբաղ և հարակից շրջաններ՝ գնահատման և միջնորդական իրենց գործունեությունն իրականացնելու համար։
Այս համատեքստում համանախագահները կողմերին հիշեցնում են իրենց երթուղիներում անարգել ելումուտ և տեղաշարժի առավելագույն ճկունություն ապահովելու պահանջի մասին՝ իրենց մանդատին և նախկին փորձին համապատասխան։
