Ռուսական գազի մատակարարումը Հայաստան ժամանակավորապես կիրականացվի Ադրբեջանի տարածքով

Ռուսական գազի մատակարարումը Հայաստան ժամանակավորապես կիրականացվի Ադրբեջանի տարածքով՝ կապված «Հյուսիսային Կովկաս-Անդրկովկաս» գազատարի վերանորոգման հետ (դրանով մատակարարումները Ռուսաստանից Վրաստան են գալիս Հայաստան), տեղեկանում ենք «Գազպրոմ էքսպորտ»-ի հաղորդագրությունից: Այս մասին հայտնում է «Ինտերֆաքսը»։

«Հյուսիսային Կովկաս-Անդրկովկաս» գազատարի պլանային նախազգուշական վերանորոգման աշխատանքների ժամանակ ռուսական գազը սպառողներին կմատակարարվի Ադրբեջանի տարածքով։ «Գազպրոմ էքսպորտ» ՍՊԸ-ն եւ Ադրբեջանի Հանրապետության պետական նավթային ընկերությունը մարտի 16-ին Ադրբեջանի տարածքով ռուսական գազի տեղափոխման կարճաժամկետ պայմանագիր են ստորագրել», - գրում է ռուսական մատակարարը:

«Պայմանագիրը նախատեսում է, որ «Հյուսիսային Կովկաս-Անդրկովկաս» մայրուղային գազատարի ռուսական հատվածում պլանային-նախազգուշական վերանորոգման աշխատանքների ժամանակ գազը սպառողին կհասնի Ադրբեջանի տարածքով մինչեւ Վրաստանի հետ սահմանը։ Աշխատանքները կարող են տեւել մոտ երեք շաբաթ: Դրանց ավարտից հետո գազը նախկինի պես կտեղափոխվի ՌԴ-ի եւ Վրաստանի սահմանով», - հավելում է «Գազպրոմ էքսպորտը»։

2020 թվականին «Գազպրոմը» Հայաստան է մատակարարել 2,209 մլրդ խորանարդ մետր գազ, 2021 թվականի հունվարին մատակարարումներն աճել են 9 տոկոսով՝ մինչեւ 310 մլն խորանարդ մետր: