Ռուս խաղաղապահների և ՀՀ ու Ադրբեջանի գլխավոր շտաբերի միջև ստեղծվել են ուղիղ կապուղիներ

Լեռնային Ղարաբաղի հակամարտության գոտում ռուս խաղաղապահների առաջադրանքներ իրականացնելու, հնարավոր միջադեպերը կանխելու և Ռուսաստանի ռազմական անձնակազմի անվտանգությունն ապահովելու համար կազմակերպվել է շարունակական փոխգործակցություն Ադրբեջանի և Հայաստանի զինված ուժերի գլխավոր շտաբերի հետ: Այս մասին հայտնել է ՌԴ Զինված ուժերի գլխավոր շտաբի գործողությունների գլխավոր վարչության պետ Սերգեյ Ռուդսկոյը:

«Ստեղծվել են ուղիղ կապուղիներ: Հայկական և ադրբեջանական կողմերի հետ համատեղ կազմակերպվել է աշխատանք խաղաղապահ գործողության կարգավորումների հստակեցման ուղղությամբ», - ասել է Ռուդսկոյը:

Նրա խոսքով, ՌԴ Զինված ուժերի գլխավոր շտաբը «հրամանատարական-վերահսկողական խումբ է տեղակայել, որը շուրջօրյա վերահսկում է իրավիճակը»:

«Խաղաղապահ զորախմբի անձնակազմը հասկանում է իր առջև դրված խնդիրների լիակատար պատասխանատվությունը և պատրաստ է դրանք կատարել՝ ձեռք բերված պայմանավորվածություններին խստորեն համապատասխան», - հավելել է Ռուդսկոյը: