Fitch-ը բարելավել է 2020 թ. համաշխարհային ՀՆԱ-ի նվազման կանխատեսումը 4,6%-ից մինչեւ 4,4%

Fitch Ratings միջազգային վարկանիշային գործակալությունը մի փոքր բարելավել է 2020 թվականի համար համաշխարհային ՀՆԱ-ի կանխատեսումը, հաղորդում է "Ինտերֆաքսը": Գործակալությունը նշել է, որ աննախադեպ ծանր ճգնաժամից հետո տնտեսական ակտիվության վերականգնումը, որը պայմանավորված է կորոնավիրուսի համավարակով, ավելի արագ է տեղի ունենում, քան սպասվում էր:

Համաշխարհային ՀՆԱ-ն ընթացիկ տարում կնվազի 4,4 տոկոսով, կանխատեսում է Fitch-ը: Հունիսին գործակալությունը կանխատեսում էր 4,6% անկում:

Այնուամենայնիվ, տնտեսության վերականգնման տեմպերը շուտով կարող են կրկին դանդաղել, ասվում է Global Economic Outlook (GEO) սեպտեմբերյան զեկույցում:

"Չինաստանն արդեն վերադարձել է ՀՆԱ նախաճգնաժամային մակարդակին, եւ ԱՄՆ-ում, Ֆրանսիայում եւ Մեծ Բրիտանիայում մանրածախ վաճառքի ցուցանիշները գերազանցում են փետրվարյան մակարդակը, սակայն մենք կասկածում ենք, որ կարելի է ակնկալել տնտեսության V-ձեւավորված վերականգնում:

Եվրոպայում գործազրկության հետ կապված լուրջ խնդիրները դեռ առջեւում են, ընկերությունները կրճատում են կապիտալ ներդրումները, եւ սոցիալական հեռահարության միջոցառումները շարունակում են սահմանափակել մասնավոր սպառումը", - նշում է Fitch Ratings-ի գլխավոր տնտեսագետ Բրայան Քուլթոնը:

Fitch-ի փորձագետները բարելավել են ԱՄՆ-ի համար 2020 թվականի կանխատեսումը: Երկրի ՀՆԱ-ն, նրանց գնահատմամբ, կնվազի 4,6 տոկոսով, այլ ոչ թե 5,6 տոկոսով, ինչպես սպասվում էր հունիսին: Այս տարվա համար չինական տնտեսության աճի կանխատեսումը դեռեւս հուլիսի վերջին գործակալության կողմից բարձրացվել էր մինչեւ 2,7 տոկոս՝ հունիսին սպասվող 1,2 տոկոսի դիմաց: