Մի շարք մեդիակազմակերպություններ հանդես են եկել հայտարարությամբ՝ դատապարտելով ոստիկանության գործողությունները:
Հայտարարության մեջ ասված է.
«2020թ․ օգոստոսի 18-ին, Ազգային ժողովի բակում, որտեղ կազմակերպվել էր զբոսանք-ակցիա հանուն Ամուլսարի և Ջերմուկի պահպանության, ոստիկանները խոչընդոտել են մի խումբ լրագրողների մասնագիտական գործունեությունը։
Այսպես, ԱԺ այգու բաց դարպասներից ներս թողնելով ակտիվիստների մի մասին ու նրանց միացած քաղաքացիներին՝ իրավապահները նախ թույլ չեն տվել ԶԼՄ-ների ներկայացուցիչներին մտնել այդ տարածք և լուսաբանել միջոցառումը, ապա պահանջել են թույլտվություն ստանալ խորհրդարանի աշխատակազմի ղեկավարից և նոր միայն նկարահանումներ կատարել։ Մոտ կես ժամ տևած վիճաբանությունից հետո նույն ոստիկանները լրագրողներին ներս են թողել՝ գրանցելով նրանց անունը, ազգանունը, հայրանունն ու լրատվամիջոցի անվանումը։
Մենք՝ ներքոստորագրյալ կազմակերպություններս, արձանագրում ենք, որ կորոնավիրուսի համավարակով պայմանավորված արտակարգ դրության ժամանակահատվածում սա առաջին դեպքը չէ, երբ ոստիկանները, յուրովի մեկնաբանելով օրենքն ու լրագրողների իրավունքները, չարաշահում են իրենց լիազորությունները և միջամտում ԶԼՄ-ների գործունեությանը։ Տեղին է վերհիշել լրատվամիջոցներից «խուճապ հարուցող» հրապարակումները հեռացնելու պահանջները, ինչպես նաև՝ ընտրողաբար հեռուստաընկերություններ այցելելն ու հաղորդումների ժամանակ դիմակ չկրելու համար վարչական վարույթ հարուցելը։
Ելնելով վերոգրյալից՝ պահանջում ենք.
- ՀՀ ոստիկանությունից՝ նշանակել ծառայողական քննություն, բացահայտել օգոստոսի 18-ին ԱԺ այգու մուտքի մոտ լրագրողների օրինական գործունեությունը խոչընդոտողներին և պատասխանատվության ենթարկել նրանց,
- ՀՀ կառավարությունից՝ հստակ հրահանգել իրավապահներին գործել իրենց լիազորությունների սահմաններում և չօգտագործել արտակարգ դրության պայմանները որպես առիթ՝ միջամտելու կամ անհիմն սահմանափակելու ԶԼՄ-ների աշխատանքը»։
Հայտարարության տակ ստորագրել են՝
ԽՈՍՔԻ ԱԶԱՏՈՒԹՅԱՆ ՊԱՇՏՊԱՆՈՒԹՅԱՆ ԿՈՄԻՏԵ
ԵՐԵՎԱՆԻ ՄԱՄՈՒԼԻ ԱԿՈՒՄԲ
ՄԵԴԻԱ ՆԱԽԱՁԵՌՆՈՒԹՅՈՒՆՆԵՐԻ ԿԵՆՏՐՈՆ
ԼՐԱԳՐՈՂՆԵՐԻ «ԱՍՊԱՐԵԶ» ԱԿՈՒՄԲ
ԻՆՖՈՐՄԱՑԻԱՅԻ ԱԶԱՏՈՒԹՅԱՆ ԿԵՆՏՐՈՆ
ԲԱԶՄԱԿՈՂՄԱՆԻ ՏԵՂԵԿԱՏՎՈՒԹՅԱՆ ԻՆՍՏԻՏՈՒՏ – ՀԱՅԱՍՏԱՆ
ՀԱՆՐԱՅԻՆ ԼՐԱԳՐՈՒԹՅԱՆ ԱԿՈՒՄԲ
«ԼՐԱԳՐՈՂՆԵՐ ՀԱՆՈՒՆ ԱՊԱԳԱՅԻ» ՀԿ
«ԼՐԱԳՐՈՂՆԵՐ ՀԱՆՈՒՆ ՄԱՐԴՈՒ ԻՐԱՎՈՒՆՔՆԵՐԻ» ՀԿ
ԳՈՐԻՍԻ ՄԱՄՈՒԼԻ ԱԿՈՒՄԲ
