Արցախը Թուրքիայից շատ հեռու է, այնպես որ լուռ ու մունջ նստեք. Մարուքյանը՝ Թուրքիայի ԱԳՆ-ին

«Լուսավոր Հայաստան» կուսակցության նախագահ Էդմոն Մարուքյանն անդրադարձել է Թուրքիայի ԱԳ նախարարության խոսնակ Համի Աքսոյնի՝ Հունաստանին և Կիպրոսին սատարող ՀՀ ԱԳՆ հայտարարության վերաբերյալ մեկնաբանությանը, որում թուրք գործիչը, ըստ էության, նշել է, որ Հայաստանը պատկերացում չունի աշխարհագրությունից և դրանում իր տեղի մասին։

Մարուքյանը նկատում է՝ ըստ խոսնակի՝ ավելին, Հայաստանն իրավունք չունի իր դիրքորոշումը հայտնելու մեզանից հեռու գտնվող Միջերկրական ծովում Թուքիայի ապօրինությունների վերաբերյալ։

«Պետք է հիասթափեցնենք պարոն խոսնակին, որովհետև Հայաստանը պետք է դատապարտի իր դաշնակիցների իրավունքների կոպիտ խախտումներն ոչ միայն ցամաքում և ոչ միայն իրեն մոտ գտնվող տարածքներում, այլ նաև օդում և ջրում, անգամ իրենից հեռու տարածքներում, որովհետև Հայաստանը միջազգային հանրության լիիրավ անդամ է, պատասխանատու գործընկեր և դաշնակից, իսկ միջազգային իրավունքի կոպիտ խախտումները չեն կարող անտարբերության թողնվել մեր կողմից։

Թուքիայի արտաքին գործերի նախարարությանը կարելի է խորհուրդ տալ ավելի լավ ուսումնասիրել միջազգային ծովային իրավունքը, որովհետև, դա անելով, նրա պաշտոնատար անձինք միգուցե կպարզեն, որ Թուրքիան ԽԱԽՏԵԼ ԵՎ ԽԱԽՏՈՒՄ Է ոչ միայն Հունաստանի և Կիպրոսի իրավունքները, այլ նաև Հայաստանի, երբ արդեն 27 տարի խոչընդոտում է Հայաստանի՝ ԴԵՊԻ ԾՈՎ ԵԼՔԻ ԻՐԱՎՈՒՆՔԻ ԻՐԱՑՈՒՄԸ։

Եվ թող հույս չունենան, որ, չվավերացնելով Ծովային իրավունքի ՄԱԿ֊ի կոնվենցիան (1982), Թուրքիան կազատվի միջազգային այդ իրավունքի ազդեցությունից։

Սովորութային միջազգային իրավունքը և Բարսելոնայի ստատուտը (1921) վկա։

Իսկ պարոն խոսնակին աշխարհագրությունից կարելի է հիշեցում անել. Արցախը Թուրքիայից շատ հեռու է։
Եթե շարժվենք նրա տրամաբանությամբ, ապա առաջինն իրենք պետք է լուռ ու մունջ նստեն, երբ արցախցիներն իրենց ինքնորոշման իրավունքն են իրացնում...»,- գրել է պատգամավորը: