ԵԱՀԿ-ն կշարունակի ջանքերը ղարաբաղյան հակամարտության կարգավորման ուղղությամբ. Էդի Ռամա

Ալբանիան, որպես ԵԱՀԿ-ում նախագահող երկիր, կշարունակի ձգտել ուժեղացնել կազմակերպության մասնակցությունը Լեռնային Ղարաբաղի հակամարտության կարգավորման գործում: Այս մասին հայտարարել է Ալբանիայի վարչապետ, ԵԱՀԿ գործող նախագահ Էդի Ռաման, հայտնում է ԵԱՀԿ մամուլի ծառայությունը:

Նա նշել է, որ ղարաբաղյան հակամարտության կարգավորումն այս տարի կարևոր տեղ կզբաղեցնի նախագահության օրակարգում՝ ԵԱՀԿ-ն բազմիցս ապացուցել է, որ կարող է գործունեություն ծավալել հակամարտային եւ հետհակամարտային իրավիճակներում։

«Որպես ԵԱՀԿ նախագահ, ձգտելու ենք շարունակել ամրապնդել կազմակերպության մասնակցությունը հակամարտության կարգավորմանը Մինսկի խմբի համանախագահների ջանքերով՝ ղարաբաղյան հիմնախնդիրը լուծելու համար: Ժնևյան միջազգային բանավեճերը և դրանց հետ կապված մեխանիզմները, Մերձդնեստրյան գործընթացը նույնպես կարևոր տեղ կզբաղեցնեն նախագահության օրակարգում»,- մեջբերում է կառույցը Ռամայի խոսքերը։