Երևանում խոզի գրիպը շարունակում է կայնքեր խլել
Հինգշաբթի առավոտվա դրությամբ Հայաստանի բուժհաստատություններում 945 հիվանդ է բուժվում, որոնց մոտ ախտորոշվել են սուր շնչառական հիվանդություններ՝ այդ թվում խոզի գրիպ։
Հիվանդների մեծ մասը՝ ավելի քան 80 տոկոսը, երեխաներ են, ինչի պատճառով Առողջապահության նախարարն այսօր նորից միջնորդեց ևս մեկ շաբաթով հետաձգել դասերը։
«Բայց, հաշվի առնելով երեխաների ութսուն տոկոս ընդհանուր հիվանդածությունը և [ելնելով] հոսպիտալացված դեպքերից և կանխարգելիչ մեր միջոցառումների ցանկում ընդգրկելով հետաձգումը մեկ շաբաթով տված իր արդյունավետությունը, առաջարկում ենք ևս մեկ շաբաթով շարունակել ձմեռային արձակուրդները, և դպրոցների, նախադպրոցական հաստատությունների աշխատանքները սկսել մեկ շաբաթ ուշացումով», - կառավարության նիստում ասաց Արմեն Մուրադյանը, հայտնում է Ազատությունը:
Երեկ Երևանում գրանցվել է խոզի գրիպից արդեն 11-րդ մահացության դեպքը․ ըստ նախարարության, 61-ամյա կինը տառապում էր սրտի հիվանդությամբ, ուներ շաքարային դիաբետ։
Նախարար Մուրադյանը բացառում է, որ մահվան դեպքերը պայմանավորված լինեն բժիշկների անուշադրությամբ կամ սխալ բուժմամբ․ - «Առհասարակ կարծում եմ, որ առողջապահական համակարգը համընդհանուր աշխատել է մեծ ծանրաբեռնվածությամբ, նվիրվածությամբ և խիստ արհեստավարժությամբ: Իսկ այն իննսուներկու հիվանդները, որոնք այսօր շարունակում են վերակենդանացման բաժիններում ստանալ իրենց բուժօգնությունը, գտնվում են խիստ հսկողության ներքո»:
Վերակենդանացման բաժիններում գտնվող այդ հիվանդներից 11-ի վիճակը գնահատվում է ծայրահեղ ծանր։
Արմեն Մուրադյանն կառավարության նիստից հետո լրագրողների հետ զրույցում անդրադառնալով գրիպի և սուր շնչառական հիվանդություններին՝ հայտարարեց, որ համաճարակ չկա:
«Համաճարակը բավական բարդ հաշվարկի ենթարկվող և բանաձևերով հաշվարկվող ցուցանիշ է: Մասնավորապես, խոսքը գնում է մեկուկես անգամ ավելի հիվանդացության շեմը գերազանցող թվի մասին, և համաճարակ հայտարարվում է, եթե այդ շեմը 4-5 անգամ է գերազանցվում: Այս պահին մեզ մոտ համաճարակ չկա»,- հայտարարեց Արմեն Մուրադյանը:
Արձագանքելով դիտարկմանը, թե բազմաթիվ են բողոքները, որ «Տամիֆլյու» դեղամիջոցն այս օրերին դեղատներում հնարավոր չէ գտնել, Արմեն Մուրադյանը նշեց, որ այդ դեղամիջոցը հատուկ ցուցումներ ու հակացուցումներ ունի և այն դեղամիջոցը չէ, որը կազատի սուր շնչառական հիվանդությունների բոլոր խնդիրներից:
«Բոլոր հիվանդանոցներում անխափան ձևով, անվճար սկզբունքներով տրամադրվել է «Տամիֆլյու»: Երեկվանից սկսած` դեղը եղել է նաև պոլիկլինիկական ցանցում` հաշվի առնելով հիվանդանոցային ծանրաբեռնվածությունը։ Այն դարձյալ անվճար է տրամադրվում»,- ընդգծեց Արմեն Մուրադյանը:
