Զինված ուժերը կարող են օգտագործվել ներպետական խնդիրներ լուծելու համար. Քոչարյանի պաշտպան

Մարտի 1-ի իրադարձությունների շուրջ ձեւավորվել են բազմաթիվ միֆեր, որոնցից մեկն այն է, որ մեր օրենսդրությունը, Սահմանադրությունը թույլ չի տալիս Զինված ուժերն օգտագործել ներպետական հարցերում, օրինակ՝ զանգվածային անկարգությունները կանխելու նպատակով:

Այս մասին այսօր ասուլիսի ժամանակ հայտարարեց ՀՀ երկրորդ նախագահ, Մարտի 1-ի գործով մեղադրյալ Ռոբերտ Քոչարյանի պաշտպան Հայկ Ալումյանը: Նա այսօր մամուլի ասուլիս է հրավիրել՝ իր խոսքով՝ Մարտի 1-ի շուրջ այս տաս տարվա ընթացքում ձեւավորված միֆերից մեկը լուսաբանելու համար․

Նրա խոսքով այս պնդումը միֆ է: «Սա միֆ է, եւ այսօր դատարանում քննվող քրեական գործը շատ մեծ չափով հիմնված է այս միֆի վրա։ Իրականում, մեր օրենսդրությունը միանշանակորեն թույլ է տալիս Զինված ուժերն օգտագործել ներպետական կարեւորագույն խնդիրներ լուծելու համար, օրինակ, եթե առկա են զանգվածային անկարգություններ»,- նշեց պաշտպանը՝ օրինակ բերելով Չինաստանի փորձը, որտեղ 2009 թվականին ներպետական հարցերում զանգվածային անկարգությունները ճնշելու նպատակով Չինաստանը ներգրավել է զինված ուժեր, որի ընթացքում եղել է 156 զոհ։

Ալումյանը բերեց նաեւ Նեպալի, Հարավաֆրիկյան Հանարապետության, Հնդկաստանի եւ մի շարք այլ երկրների օրինակներ։ Նա ասաց, որ ԱՄՆ-ի օրենսդրությունը թույլ է տալիս կիրառել զինված ուժեր՝ ապստամբությունների, հանցավոր գործողությունենրի ժամանակ, որոնք ունեն իշխանությունները, օրինական մարմինները տապալելու նպատակ, խախտում են մարդու իրավունքները։

Ըստ Քոչարյանի պաշտպանի՝ ՀՀ օրենսդրությունը ուղղակիրորեն թույլ է տալիս եւ միշտ թույլ է տվել զինված ուժերն օգտագործել զանգվածային անկարգությունները ճնշելու նպատակով։

Հայկ Ալումյանը նաեւ հղում արեց ՀՀ Սահմանադրության 8.2-րդ հոդվածին, որտեղ նշված է, որ Զինված ուժերը ապահովում են Հայաստանի Հանրապետության անվտանգությունը, պաշտպանությունը եւ տարածքային անվտանգությունը, սահմանների անձեռնմխելիությունը։

«Իսկ ի՞նչ է անվտանգությունը։ Այն ներքին եւ արտաքին սպառնալիքներից պաշտպանվելու հնարավորություն է։ Ներքին անվտանգությունը ներառում է նաեւ այլ մարտահրավերների հետ զանգավածային անկարգություններ, տեռորիստական ակտեր եւ այլն, Անվտանգությունը կարող է խախտվել զանգվածային անկարգությունների հետեւանքով»,- մեկնաբանեց պաշտպանը։

Նշենք, որ Ալումյանի մեջբերած ՀՀ Սահմանադրության 8․2 հոդվածն ունի շարունակություն, որտեղ բացի վերը նշվածից ասված է, որ «Զինված ուժերը քաղաքական հարցերում պահպանում են չեզոքություն եւ գտնվում են քաղաքացիական վերահսկողության ներքո»։