Ունենք 25 ներդրումային ծրագիր՝ 254 մլն դոլարի ներդրման պայմանով. վարչապետ

126

Ներդրումների մասով այս տարվա առաջին 5 ամիսներին ՝ նախորդ տարվա առաջին 5 ամիսների նկատմամբ ունենք 7 անգամ աճ, իսկ աշխատատեղերի մասով ունենք 4 անգամ աճ: Այս մասին այսօր՝ կառավարության նիստում ասաց ՀՀ վարչապետ Նիկոլ Փաշինյանը:


«Վերջին շրջանում շատ են քննարկվում Հայաստանում ներդրումային միջավայրի հետ կապված հարցերը: Կառավարությունը ներդրումները խրախուսելու առնչությամբ ունի այս գործիքը՝ ԱԱՀ-ի վճարման հետաձգումը 3 տարով եւ մաքսատուրքից ազատումը: Այդ գործիքով մենք նաեւ որոշակի ազդակներ ենք ստանում, թե ինչ է տեղի ունենում տնտեսության մեջ:


Այս գործիքների կիրառման արդյունքում եկեք համեմատենք, թե ինչ ունենք անցած տարվա առաջին 5 ամիսների կտրվածքով եւ ինչ ունենք այս տարվա առաջին 5 ամիսների կտրվածքով: Անցած տարի՝ 2018 թվականին այս գործիքակազմով կառավարությունը հաստատել է 11 ծրագիր 35.3 մլն դոլար ներդրման խոստումով եւ 502 աշխատատեղով: Այս տարի հունվար-մայիսին ունենք 25 ներդրումային ծրագիր՝ 254 մլն դոլարի ներդրման պայմանով եւ 2379 աշխատատեղով: Այսինքն ներդրումների մասով այս տարվա առաջին 5 ամիսներին ՝ նախորդ տարվա առաջին 5 ամիսների նկատմամբ ունենք 7 անգամ աճ, իսկ աշխատատեղերի մասով ունենք 4 անգամ աճ: Սրանք այն թվերն են, որոնք կոնկրետ պատկեր են արտահայտում»,- ասաց վարչապետը:


Միեւնույն ժամանակ կառավարության գերակա ոլորտում իրականացվող ներդրումային ծրագրի շրջանակներում մաքսային արտոնություն տրամադրեց «Մանուկյան կոնյակի գործարան» ՍՊ ընկերությանը:


Ընկերության կողմից ներմուծվող ապրանքներն օգտագործվելու են խաղողի և մրգային գինիների, կոնյակի և մրգային օղիների արտադրության մեջ։


Արդեն իսկ իրականացվել է 1 մլրդ 540 մլն դրամի ներդրում: Նախատեսվում է ծրագրի շրջանակում իրականացնել 1.3 մլրդ դրամի ներդրում սարքավորումների ձեռքբերման և շինարարական աշխատանքների համար:


Ներկայումս առկա է 4 աշխատատեղ: Նախատեսվում է ներդրումային ծրագրի շրջանակում ստեղծել 42 նոր աշխատատեղ՝ 260 հազար դրամ միջին աշխատավարձով։


Ծրագրով նախատեսված արտադրանքի ընդհանուր ծավալը կկազմի 1.3 մլրդ դրամ, որից 300 մլն դրամի արտադրանքը կիրացվի ՀՀ տարածքում, 500 մլն դրամի արտադրանքը ԵԱՏՄ այլ անդամ երկրների տարածքում, 400 մլն դրամի արտադրանքը` երրորդ երկրների տարածքում (100 մլն ՀՀ դրամի արտադրանքը նախատեսվում է պահեստավորել):


Արտոնություն ստանալու համար ներկայացված ապրանքների արժեքը կազմում է 276 մլն 953 հազար դրամ: Մաքսատուրքի ազատման արտոնությունը կազմում է 26 մլն 447 հազար դրամ:

Տպել

Թեմայի այլ նորություններ
Загрузка...