Ստեղծված է պայթյունավտանգ իրավիճակ․ «Ջազզվե»-ի հայտարարությունը՝ բողոքը դադարեցնելու մասին

287

«Ջազզվե» ընկերության համասեփականատեր Արմեն Պետրոսյանը հայտարարություն է տարածել Օպերայի տարածքում տեղի ունեցող իրադարձությունների վերաբերյալ: Այն ներկայացնում ենք ամբողջությամբ.


«Սիրելի երևանցիներ, այն ինչ այս օրերին տեղի է ունենում Օպերայի տարածքում ցավալի իրողություն է, որը շտկելու ու իրադարձություններն իրենց ճիշտ հուն վերադարձնելու պատասխանատվությունը յուրաքանչյուրինս է։


Իրենց աշխատանքային առօրյա օրակարգը ոչ իրենց կամքով ցուցարարի ճակատագրի հետ փոխած մարդիկ այսօր քաշքշվեցին, գետնին տապալվեցին, ոմանք նաև վիրավորվեցին։ Ցավոք տուժողներ եղան նաև ոստիկանական ուժերից, ու ինքնին այս փաստը գոնե մեզ հուշում է, որ պետք է կանգ առնել անհապաղ։ Ոչ մի բիզնես շահ ու ոչ մի քաղաքականություն մարդկային կյանք չարժե ու մենք դա հստակ գիտակցում ենք։


Կտրականապես դեմ լինելով ժողովրդի տարբեր հատվածներ իրար դեմ լարելու նոր ձևավորված ավանդույթին՝ ցանկանում ենք ընդգծել, որ մենք միշտ եղել ենք աշխատանքային խնդիրները կարգավորելու ու երկխոսության ճանապարհով հարթելու կողմնակիցը։ Ցավոք այս անգամ մեզ հետ երկխոսել չկամեցան ու որոշեցին շփվել ուժի լեզվով։


Ինչևէ, այսօրվա քաղաքային իշխանությունները հայտարարում են, որ ստանձնել են պատասխանատվություն քաղաքի բարեկարգման համար, ու մենք մաղթում ենք իրենց սկսած գործում հաջողություն։ Ժամանակը ցույց կտա, թե որքանով էին նրանց այս քայլերն արդարացված ու որքանով էին նրանց առաջ բերած մոտիվներն ազնիվ։


Հաշվի առնելով ստեղծված պայթյունավտանգ իրավիճակը՝ կոչ ենք անում մեր բոլոր գործընկեր սրճարանների սեփականատերերին և աշխատակիցներին դադարեցնել բողոքի ակցիաները և պայքարը տեղափոխել բացառապես իրավական հարթություն»։


Երևանի քաղաքապետարանի հրամանով սկսվել են Օպերայի հարակից տարածքի սրճարանների ապամոնտաժման աշխատանքները։ Սա հարուցել է սրճարանների սեփականատերերի և աշխատակիցների բողոքը:


Բողոքի ակցիան մերթընդմերթ վերածվում է քաշքշուկի ու ոստիկանության հետ բախումների: Մարտի 14-ին ակցիայի մասնակիցներն անգամ փակեցին Մաշտոց-Թումանյան խաչմերուկը։ Ոստիկանները նրանց հեռացրին փողոցի երթևեկելի հատվածից։ Այդ ընթացում Ազատության հրապարակի հարակից տարածքից ոստիկանության բաժին տեղափոխվեց 16 քաղաքացի՝ ոստիկանների օրինական պահանջը չկատարելու համար։


Մայրաքաղաքի կենտրոնում ընթանում է մասնավոր և հանրային շահերի միջև պայքար: Քաղաքապետարանը սակայն չի պատրաստվում զիջել: Ապամոնտաժման աշխատանքները դժվարությամբ, սակայն դանդաղ ընթանում են: Քաղաքապետարանն արդեն ներկայացրել է, թե ինչ տեսք է ստանալու տարածքը սրճարանների ապամոնտաժումից հետո: Այն բարեկարգվելու և կանաչապատվելու է։

Տպել

Թեմայի այլ նորություններ
Загрузка...