Իրերը հավաքեք ու գնացեք ձեր գործին. Փաշինյանը թերացած պաշտոնյաներին ցույց տվեց դռան տեղը

Վարչապետի պաշտոնակատար Նիկոլ Փաշինյանը կառավարության այսօրվա նիստում անդրադարձավ այն պաշտոնյաներին, որոնք թերացել են՝ ցույց տալով նրանց դռան տեղը:

Անդրադարձավ պետական կառավարման համակարգի օպտիմալացմանը նա, մասնավորապես, մատնանշեց, որ 2019 թվականի պետական բյուջեի հայտերի քննարկման համատեքստում կոնկրետ հանձնարարականներ է տվել: Փաշինյանը նշեց, որ վերադառնում է այդ թեմային.

«Վայ այն պաշտոնյաներին, որ իմ հանձնարարականներն այս կոնտեքստում չեն կատարել: Այսինքն, մենք այսքան խոսում ենք, որ այս երկիրը կառավարվում է «ծիգիզմի», «պոակիզմի» և «հիմնադրամիզմի» տրամաբանությամբ, և ամեն անգամ, երբ բանը գալիս է հարցեր լուծելուն, պարզվում է, որ նորից պետք է քննարկել: Ոչ մի բան նորից չպետք է քննարկենք. ի՞նչ է ԾԻԳ-ը՝ «պադավատներ», «ատկատներ», կոռուպցիա, կոռուպցիայի ամենամեծ օջախներ: Գնացեք, մտեք ցանկացած ոլորտ՝ այնտեղ են և շուտով հերթով կբացահայտվեն:Հերիք է, ամեն անգամ ասում են՝ նախարարությունում, գիտեք, աշխատողները կարողություններ չունեն: Այդ նախարարություններն ուրեմն լուծարենք, բա ինչի՞ համար ենք պահում այս ամբողջ պետական կառավարման համակարգը ու բաժանել ենք պետական պաշտոնյաներին սորտերի՝ առաջին սորտի, երկրորդ սորտի, երրորդ սորտի ու հետո ասում ենք պետական կառավարման համակարգի աշխատավարձերը բարձրացնենք: Ո՞նց բարձրացնենք աշխատավարձերը, երբ կան պետական կառավարման համակարգեր, երբ մարդիկ ստանում են բոլորից բարձր, 10 անգամ բարձր աշխատավարձ: Ի՞նչ է, իրենք արտոնյալնե՞ր են: Ես ասում եմ՝ այս թեմայով կայացվել է քաղաքական որոշում, և ես կանդրադառնամ»,- հայտարարեց նա:

Նիկոլ Փաշինյանը նաև նշեց, որ այն պաշտոնյաները, որ հանձնարարականները չեն կատարել, այսօրվանից կարող են իրենց իրերը հավաքել ու գնալ իրենց գործին:

«Շատ հստակ եմ ասում», - հավելեց վարչապետի պաշտոնակատարը: