Էր Ռիադում ցանկանում են Խաշոգջիի սկանդալի պատճառով գահաժառանգ արքայազնին փոխել

Սաուդյան Արաբիայի թագավորական ընտանիքի որոշ անդամներ մտադիր են լրագրող Ջամալ Խաշոգջիի սպանության պատճառով ծագած միջազգային սկանդալի ֆոնին թույլ չտալ, որ գահաժառանգ արքայազն Մուհամմեդ բեն Սալման Ալ Սաուդը գահ բարձրանա, հայտնում է «Ռեյթեր» գործակալությունը՝ վկայակոչելով թագավորական ընտանիքին մոտ երեք աղբյուրի:

Աղբյուրների փոխանցմամբ՝ «տասնյակ արքայազններ» եւ թագավորական ընտանիքի այլ անդամներ ցանկանում են գահին տեսնել այլ ժառանգորդի, սակայն նրանք չեն գործի մինչ Սաուդյան Արաբիայի 82-ամյա թագավոր Սալման բեն Աբդել Ազիզ Ալ սաուդը ողջ է: Միապետի մերձավորների կարծիքով՝ թագավորը հազիվ թե դեմ լինի իր «սիրելի որդուն»:
Թագավորի մահից հետո, գործակալության տեղեկություններով, ընտանիքի անդամները ցանկանում են նրա տեղում տեսնել Ահմեդ իբն Աբդուլլահ Ազիզ իբն Սաուդին՝ թագավորի 76-ամյա կրտսեր եղբորը: Դրանից բացի, աղբյուրների տեղեկացմամբ, արքայազն Ահմեդին կաջակցեն նաեւ արեւմտյան տերությունները:

Աղբյուրները նաեւ հայտարարում են, որ ոչ ավելի, քան 2 շաբաթ առաջ ամերիկացի բարձրաստիճան պաշտոնյաները սաուդցի խորհրդականներին հայտնել են, որ իրենք կսատարեն արքայազն Ահմեդ իբն Աբդուլլահին որպես թագավորի հավանական ժառանգորդի: