Հոկտեմբերի 29-30-ին Երեւանում կկայանան ՀԱՊԿ ԽՎ խորհրդի եւ վեհաժողովի լիագումար նիստերը

ՀՀ ԱԺ աշխատակազմի ղեկավար-գլխավոր քարտուղար Արա Սաղաթելյանը հանդիպել է ՀԱՊԿ ԽՎ-ի պատասխանատու քարտուղար Պյոտր Ռյաբուխինի հետ:

Հանդիպման ընթացքում քննարկվել են հոկտեմբերի 29-30-ին Երեւանում կայանալիք ՀԱՊԿ ԽՎ խորհրդի եւ վեհաժողովի լիագումար նիստերի աշխատանքների կազմակերպմանն առնչվող հարցեր:

Ողջունելով հյուրին ՀՀ Ազգային ժողովում՝ Արա Սաղաթելյանը նշել է, որ ՀԱՊԿ ԽՎ լիագումար նիստն առաջին անգամ է անցկացվելու Երեւանում, եւ մեր երկիրը լրջորեն պատրաստվում է նման կարեւոր իրադարձությանը՝ գործադրելով հնարավոր բոլոր ջանքերն աշխատանքային արդյունավետ մթնոլորտ ապահովելու ուղղությամբ: ՀՀ ԱԺ աշխատակազմի ղեկավար-գլխավոր քարտուղարը համոզմունք է հայտնել, որ նիստերը կանցկացվեն բարձր մակարդակով, իսկ քննարկումները կլինեն արդյունավետ:

Կողմերն անդրադարձել են ՀԱՊԿ-ի շրջանակում խորհրդարանական փոխգործակցությանը: Արա Սաղաթելյանի խոսքով՝ վեհաժողովն իր նպաստն է բերում տարածաշրջանային անվտանգության օրենսդրական ապահովման գործում: Այս համատեքստում խորհրդարանի աշխատակազմի ղեկավարն ընդգծել է, որ հայկական պատվիրակությունն ակտիվորեն եւ հետեւողականորեն աշխատում է ՀԱՊԿ խորհրդարանական վեհաժողովում, մշտապես իրականացնում է լուրջ փորձագիտական աշխատանք եւ գնահատականներ ներկայացնում վեհաժողովի ներկայացրած բոլոր փաստաթղթերի վերաբերյալ:

Պյոտր Ռյաբուխինն իր հերթին համոզմունք է հայտնել, որ նիստերը Երեւանում կանցկացվեն բարձր մակարդակով, հաշվի կառնվեն կազմակերպչական բոլոր առանձնահատկությունները: