Քաղաքական ինտրիգների պատճառով ԵՄ-ն դադարեցրել է Մոլդովային 100 մլն եվրո տրանշի փոխանցումը

Քիշնևն առանց քաղաքապետի է մնացել, չնայած նրան, որ քաղաքապետի ընտրությունները կայացել են: Բայց բոլոր ատյանների դատարանները չեղարկել են ընտրությունների արդյունքները, իսկ Մոլդովայի ԿԸՀ-ն հայտարարել է, որ նոր ընտրություններ չեն լինելու, գրում է Независимая Газета-ն:

ԵՄ-ում դատապարտել են ընտրողների ընտրությունը չհարգելու մասին դատարանների որոշումը և դադարեցրել Քիշնևին 100 միլիոն եվրոյի տրանշի փոխանցումը:

Դատական կարգով քվեարկության արդյունքների չեղարկումը բողոքի ալիք է առաջացրել Եվրամիությունում և Պետքարտուղարությունում: ԵՄ-ում քաղաքապետի ընտրությունների արդյունքների վերաբերյալ դատարանների որոշումը գնահատվել է որպես ժողովրդի ընտրության նկատմամբ ոտնձգություն: Ինչպես հայտնել է Եվրահանձնաժողովի մամուլի ծառայությունը newsmaker.md խմբագրության դիմումին ի պատասխան, Եվրամիության մակրոֆինանսական օգնության առաջին տրանշի հատկացումը հետաձգվել է՝ Քիշնևում ընտրությունների արդյունքների չեղարկման մասին բարձրագույն դատական պալատի որոշման պատճառով:

Սոցիալ-դեմոկրատական կուսակցության առաջնորդ Վիկտոր Շելինի խոսքով՝ այդկերպ իշխող Դեմոկրատական կուսակցությունը հեռացրել է հակառակորդներին աշնանը նախատեսվող խորհրդարանական ընտրություններից առաջ:

Շելինի կարծիքով՝ խորհրդարանական ընտրություններին ընտրողներն առաջին անգամ քվեարկելու են ոչ թե ԵՄ-ի կամ ՌԴ-ի համար, այլ՝ տնտեսական և սոցիալական արդարության: