29.03.2024
Փակել ենք քաղբանտարկյալների, բացել կոռուպցիայի դեմ պայքարի էջը․ Փաշինյան
prev Նախորդ նորություն

Նորություններ գործընկերներից

Երիտասարդ ընտանիքների համար բնակարանների գնման վարկային տոկոսները կնվազեն մինչև 7 տոկոս

Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել են երիտասարդ ընտանիքների եւ զինծառայողների բնակարանային խնդիրների լուծման հնարավորությունները։ Այս մասին հայտնում են կառավարության մամուլի ծառայությունից։


«Հավաքվել ենք մի շատ կարեւոր թեմա քննարկելու համար: Խոսքը վերաբերում է սոցիալական նշանակության հիփոթեքային վարկային ծրագրերին, որոնց համատեքստում հիմնական շահառուների խումբը, որոնց հարցերով պետք է զբաղվենք, երիտասարդ ընտանիքներն են եւ զինծառայողները: Հույս ունենք, որ այս փուլում ռեալ հնարավորություն կլինի, որպեսզի շոշափելի ծավալներով կարողանանք լուծել զինծառայողների ու երիտասարդ ընտանիքների բնակարանային խնդիրները շատ ավելի լավ պայմաններով եւ շատ ավելի մեծ ծավալներով, քան ունեցել ենք նախկինում»,- ասել է Նիկոլ Փաշինյանը:


Կենտրոնական բանկի նախագահ Արթուր Ջավադյանը նշել է, որ առեւտրային բանկերի հետ ունեցած բանակցությունների արդյունքներով նախատեսվում է երիտասարդ ընտանիքների համար բնակարանների ձեռքբերման վարկային տոկոսադրույքները նվազեցնել մինչեւ 7-7,5 տոկոս: Բնակարանների ձեռքբերման կանխավճարը կազմելու է 20 տոկոս, հիփոթեքային վարկերի մարման ժամկետը նախատեսվել է մինչեւ 30 տարի: Զինծառայողների պարագայում կանխավճարի 10 տոկոսը սուբսիդավորելու է Պաշտպանության նախարարությունը, իսկ վարկերի տոկոսագումարը փոխհատուցվելու է նրանց աշխատավարձի եկամտային հարկից:


Որպես օրինակ՝ նշվել է, որ երիտասարդ ընտանիքի ընդհանուր ամսական չհարկված եկամուտը 450 հազար դրամ լինելու պարագայում նշված ծրագրով 20 մլն դրամ արժողությամբ եւ 70 քմ տարածքով բնակարան ձեռք բերելու դեպքում, 20 տարի մարման ժամկետով եւ 7-7.5 տոկոս տոկոսադրույքի պայմաններում, վարկի տոկոսագումարն ամբողջությամբ կփոխհատուցվի շահառուի եկամտային հարկից ու վերջինս կմարի միայն մայր գումարը՝ ամսական 65-70 հազար դրամի չափով:


Նշվել է, որ երիտասարդ ընտանիքների եւ զինծառայողների բնակարանային ծրագիրն իրականացվելու է ոչ միայն Երեւանում, այլ նաեւ մարզերում՝ հաշվի առնելով տարածքային համաչափ զարգացման կարեւորությունը:


Նիկոլ Փաշինյանը կարեւորել է ծրագրերի իրականացման համար փորձառու շինարարի ընտրությունը եւ ընդգծել, որ պետք է անել ամեն ինչ՝ հնարավոր ռիսկերը նվազագույնի հասցնելու նպատակով: Վարչապետն ընդգծել է, որ այս ծրագրերն ունեն մեծ կարեւորություն, կառավարության առաջնահերթությունների թվում են եւ պետք է բացառել կոռուպցիոն որեւէ դրսեւորում ու խոչընդոտ:


Կառավարության ղեկավարը համոզմունք է հայտնել, որ ծրագրերի հաջող իրականացումը հնարավորություն կտա առաջիկա տարիներին ընդլայնել դրանց ծավալները՝ երիտասարդ ընտանիքներին ու զինծառայողներին բնակարաններով ապահովելու խնդրին արդյունավետ լուծում տալու համար: Նիկոլ Փաշինյանը հանձնարարել է ձեւավորել միջգերատեսչական հանձնաժողով՝ ծրագրերը վերջնական տեսքի բերելու եւ դրանք կառավարության հաստատմանը ներկայացնելու համար:

Մամուլ. Ո՞վ է «փուռը տվել» Վաչագան Ղազարյանին` Սերժի Վաչոյին
Հաջորդ նորություն next
 Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար
25.03.2024
Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար