Տգետ տնօրենները պետք է հանվեն աշխատանքից, ինձ չի հետաքրքրում բացատրություններ. Փաշինյան

Հայաստանցի աշակերտների գրանցած ցածր ցուցանիշները PISA 2025 միջազգային ստուգատեսում հարուցել են վարչապետ Նիկոլ Փաշինյանի կոշտ արձագանքը՝ կառավարության նիստում հանգեցնելով կրթական համակարգում արմատական մաքրումների պահանջի:

Տնտեսական համագործակցության և զարգացման կազմակերպության՝ 2026 թվականի սեպտեմբերին հրապարակած զեկույցի համաձայն՝ Հայաստանի 15-ամյա պատանիները զիջում են ՏՀԶԿ միջին և տարածաշրջանային ցուցանիշներին։

Շուրջ 7000 մասնակիցների արդյունքներով՝ Հայաստանը 74-րդն է մաթեմատիկայից, 79-րդը՝ բնագիտությունից և 80-րդը՝ ընթերցանությունից։ Աշակերտների 81 տոկոսը չի հաղթահարել ֆունկցիոնալ գրագիտության բազային շեմը՝ դժվարանալով ընկալել տեքստերի իմաստը, թեև սովորողների գրեթե կեսը շաբաթական առնվազն մեկ անգամ կիրառում է արհեստական բանականության գործիքներ:

Սեպտեմբերի 11-ի գործադիրի նիստում Նիկոլ Փաշինյանը ստեղծված իրավիճակը վերագրեց նախկին կառավարման արատավոր բարքերին և կադրային լուրջ խնդիրներին։ «Մենք այդ գրագիտության պակասը ամեն օր տեսնում ենք․․․ Մենք գլոբալ խնդիր ունենք իմանալու՝ ինչ է պետությունը, հասարակությունը, տնտեսությունը», — ընդգծել է վարչապետը։ Նա նախկին իշխանություններին մեղադրել է դպրոցներն ընտրակեղծարարության և կոռուպցիայի հարթակի վերածելու մեջ՝ պահանջելով անհապաղ ազատվել անորակ կադրերից։

«Տգետ տնօրենները պետք է հանվեն աշխատանքից։ Ինձ չի հետաքրքրում բացատրություններ, այդ ամբողջ մասային պետք է դուրս հանել», — հայտարարել է Փաշինյանը։

Վարչապետը հավելել է, որ հենց համակարգային այս ճգնաժամով են արդարացվում հարյուրավոր նոր դպրոցների կառուցման և ուսուցիչների պարտադիր ատեստավորման կառավարական ծրագրերը։ Կրթության, գիտության, մշակույթի և սպորտի նախարարությունն իր հերթին հստակեցրել է, որ այս թվերը զուտ ելակետային են, քանի որ թեստավորումն իրականացվել է հին չափորոշիչներով սովորած աշակերտների շրջանում։ Գերատեսչությունն ակնկալում է, որ ներկայումս իրականացվող համալիր բարեփոխումների իրական պատկերը տեսանելի կլինի միայն PISA 2029-ի արդյունքներում։