"Սահամանդրության նախագծի վերաբերյալ սկզբունքային տարաձայնություններ չկան"

Նախագահ Սերժ Սարգսյանն ընդունել է «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) ներկայացուցիչներին:

Ինչպես տեղեկացնում են նախագահի մամլո ծառայությունից, Սարգսյանը շնորհակալություն է հայտնել Հայաստանի Սահմանադրության փոփոխությունների նախագծի մշակման գործընթացում միջազգային կառույցի ցուցաբերած բարձրորակ մասնագիտական օժանդակության համար՝ կարևորելով դրա նշանակությունը երկրում ընթացող իրավական բարեփոխումների գործում: Հանդիպման ընթացքում շեշտվել է, որ քննարկվող նախագծի կապակցությամբ սկզբունքային տարաձայնություններ չկան:

Մտքեր են փոխանակվել ժամանակակից սահմանադրական զարգացումների, ինչպես նաև Հայաստանի Սահմանադրության փոփոխությունների նախագծում տեղ գտած ժողովրդավարական նորամուծությունների կապակցությամբ:

Հիշեցնենք, որ Հայաստանի Սահամանադրության փոփոխությունների նոր նախագծով առաջարկվում է անցում կատարել գործող կիսանախագահական համակարգից խորհրդարանականի: Նախագիծը քննադատում են ընդդիմադիր ուժերը և որոշ փորձագետներ՝ համարելով այն իշխանության վերարտադրության միջոց: