Պաշտպանության նախկին նախարար Վիգեն Սարգսյանի օրոք մեկնարկած «Ես եմ» և «Պատիվ ունեմ» ծրագրերը կշարունակվեն իրագործվել: Այս մասին ԱԺ-ում լրագրողների հետ ճեպազրույցում հայտարարեց պաշտպանության նախարար Դավիթ Տոնոյանը։
«Դրանք մենք դիտարկում ենք որպես ժամկետային զինվորական ծառայության տեսակ։ Այդ տարբերակը առաջարկվել է, կիրառվում է և չի խոչընդոտում մեր զինված ուժերին զարգանալ»,- հայտարարեց Տոնոյանը։
Aysor.am-ի փոխանցմամբ, պաշտպանության նախարարը դրական արտահայտվեց նաև նախորդ կառավարության մեկ այլ նախաձեռնության մասին, երբ բանակից խուսափած և հետախուզման մեջ գտնվող Հայաստանի քաղաքացիները դադարեն վճարել բաց թողնված զորակոչի համար։
Նկատենք, որ Հանրապետական խմբակցությունը նախորդ նստաշրջանում փոփոխություն էր առաջարկել «Սահմանված կարգի խախտմամբ զինծառայություն չանցած քաղաքացիների մասին» օրենքում և նախագիծն ընդունվել էր։ Ըստ այդ օրենքի, ՀՀ այն քաղաքացիները, ում 27 տարին լրանում է մինչև 2017 թվականի դեկտեմբերի 1-ը, հնարավորություն կունենան ամեն բաց թողնված զորակոչի համար վճարելով 200 հազար դրամ՝ ազատվել քրեական հետապնդումից և վերադառնալ հայրենիք: Օրենքը գործելու է մինչև 2019 թվականի դեկտեմբերի 31-ը:
«Ինչ-որ մի պահի այդ գործընթացը պետք է կանգ առնի, թե չէ ստացվում է, որ մենք անընդհատ խրախուսում ենք՝ գնացեք, քսանյոթ տարին կլրանա, կվերադառնաք, որոշ մուծումներ անելով կազատվեք բանակային ծառայությունից։ Պետք է կանգ առնել», -հայտարարեց պաշտպանության նախարարը։
Անդրադառնալով վարչապետի այն հայտարարություններին, թե պետք է թեթևացնել բանակում զինծառայող ունեցող ծնողի հոգսը և այնպես անել, որ ծնողները կենցաղային իրեր չուղարկեն զորամասներ, իրենց ծառայող որդուն, Դավիթ Տոնոյանն ասաց, որ այդ բարեփոխումը սկսվել է դեռ նախորդ նախարարի պաշտոնավարումից։
«Որպես պաշտպանության նախարար ձեզ հայտարարում եմ՝ մեր համազգեստը ժամանակի ընթացքում բարելավվել է և այն, ինչ մենք ունեցել ենք 1992, 2002-ին և հետո՝ 2017 և 2018 թվականներին, տարբերվում են։ Այս պահին զինծառայողների հագուստի ու այլ կենցաղային հարցերի հետ կապված փոփոխությունները կատարվել են պաշտպանության նախկին նախարարի ժամանակ, փոխվեց ձևաչափը, փոխվեց չափանիշը։ Այս պահից սկսած մենք ուղղակի շարունակելու ենք բարելավել և դարձնել էլ ավելի լավը», -հայտարարեց Տոնոյանը։
Դավիթ Տոնոյանը նաև անդրադարձավ հայտնի «1000 դրամների»` Զինծառայողների ապահովագրության հիմնադրամի ծրագրին, որը նույնպես Վիգեն Սարգսյանի նախաձեռնությունն էր:
Գործող նախարարն ասաց, որ այդ ծրագիրը կշարունակվի ու ավելացրեց.
«Այս պահին որևէ հիմք չկա վերացնելու այդ ծրագիրը»։
