Փախուստ ՀՀԿ-ի՞ց, թե՞ ցանկության կատարում. ինչո՞ւ Շիրակ Թորոսյանն աջակցեց Նիկոլ Փաշինյանին

Սամցխե-Ջավախքի վեց հասարակական կազմակերպություններ ողջունում են Հայաստանի Ազգային ժողովի պատգամավոր, «Ջավախք» հայրենակցական միության նախագահ Շիրակ Թորոսյանի՝ մայիսի 8-ին ՀՀ վարչապետի ընտրության ժամանակ ժողովրդի թեկնածու Նիկոլ Փաշինյանի օգտին քվեարկելու որոշումը և շնորհակալություն են հայտնում իրենց հորդորները հաշվի առնելու համար:

«Միաժամանակ դատապարտում ենք ՀՀ ԱԺ ՀՀԿ խմբակցության ղեկավար Վահրամ Բաղդասարյանի որակումներն այս փաստի առնչությամբ և կոչ ենք անում զերծ մնալ նման հռետորաբանությունից, քանզի «Ջավախք» հայրենակցական միության նախագահն իր քվեարկությամբ արտահայտել է ջավախքահայության ճնշող մեծամասնության անառարկելի ցանկությունը», - ասված է «Ջավախք» ժողովրդական շարժման, «Վիրք»կուսակցության, «Միասնական Ջավախք» հասարակական կազմակերպության, Ջավախքի մտավորականների միության, «Ջավախք»հասարակական կազմակերպության ևՍամցխե-Ջավախքի մեդիա վերլուծական կենտրոնի հայտարարությունում:

Հիշեցնենք, ժողովրդական շարժման առաջնորդ Նիկոլ Փաշինյանը Հայաստանի վարչապետ ընտրվեց՝ Ազգային ժողովում ստանալով 59 ձայն, դեմ էր քվեարկել 42 պատգամավոր: Խորհրդարանական մեծամասնության՝ Հանրապետական խմբակցության ղեկավար Վահրամ Բաղդասարյանը քվեարկությունից առաջ հայտարարել էր, թե Փաշինյանին ձայն կտա խմբակցության «10+1» պատգամավոր, մինչդեռ կողմ էին քվեարկել խմբակցության 13 պատգամավորներ, այդ թվում՝ Շիրակ Թորոսյանը:

«Հրապարակ» թերթի հարցին՝ ինչո՞ւ չստացվեց «կոնտրոլի» տակ պահել ողջ կուսակցությունը, և սա չի՞ նշանակում, որ առաջիկայում ՀՀԿ-ից մեծամասնություն չի մնա խորհրդարանում, Վահրամ Բաղդասարյանն այսպես է արձագանքել․ - «Գեղ չկա, որ շուն չլինի։ Նախ՝ նա կուսակցական չէ ու այնքան ուժ չունեցավ, որ ասի՝ չեմ ենթարկվում քաղաքական ուժի որոշմանը։ Երկրորդն էլ՝ տրամադրությունները տեսնելով, ես համոզված եմ, որ մենք չենք տրոհվի, մարդիկ, որոնք ակտիվ քաղաքականությամբ են զբաղվել, չկան կողմերի շարքերում»։