Անձամբ չեմ ճանաչում ո՛չ Միխայիլ Սահակաշվիլիին, ո՛չ Ալեքսեյ Նավալնիին. Փաշինյան

Անձամբ չեմ ճանաչում Միխայիլ Սահակաշվիլուն և չեմ ճանաչում նաև Ալեքսեյ Նավալնիին: Այս մասին Ազգային Ժողովի ամբիոնից հայտարարեց ՀՀ վարչապետի թեկնածու Նիկոլ Փաշինյանը:

«Անձամբ չեմ ճանաչում նրանց և երբևէ միջնորդավորված շփում նրանց հետ չեմ ունեցել»,- ասաց ընդդիմադիր պատգամավորը:

Նրա խոսքով, աշխարհում շատ մեծ արձագանք է գտել այն, ինչ կատարվում է Հայաստանում և եթե փորձենք հասկանանք, թե ինչ արձագանքներ են դրանք, ովքեր էին, որ ինչ-որ վերաբերմունք են արտահայտել հայաստանյան զարգացումներին, ապա կտեսնենք ամենատարբեր ազգությունների, կողմնորոշումների մարդկանց: Բայց դա, շեշտեց նա, որևէ կերպ չի ազդում տեղի ունեցող իրողությունների էության վրա:

«Սահակաշվիլիի Վրաստան վերադառնալ-չվերադառնալու գործը բացառապես նրա անձնական գործն է ու Վրաստանրի ներքին գործն է: Եվ ես Հայաստանի և իմ առնչությունն այդ թեմաների հետ որևէ կերպ չեմ տեսնում»,- հավելեց Փաշինյանը:

Հիշեցնենք, համաժողովրդական շարժման գրեթե առաջին իսկ օրերին Վրաստանի նախկին նախագահը Facebook-յան գրառումների միջոցով իր աջակցությունն էր հայտնել շարժումն առաջնորդող Նիկոլ Փաշինյանին: