ԵԱՏՄ, Արցախ, ապագա կառավարություն. ի՞նչ հարցեր են Փաշինյանի քննարկումների օրակարգում
Երբ դու ընդդիմություն ես, հնարավորություն չունես այս կամ այն կառույցում եղած խնդիրները քննարկել այդ կառույցի գործադիր մակարդակում: Իսկ երբ դու իշխանություն ես ներկայացնում, ապա հնարավորություն ունես բոլոր խնդիրները համախատասխան փաստաթղթավորել և գործընկերների հետ քննարկել: Այս մասին ԱԺ-ում լրագրողների հետ ճեպազրույցում հայտարարեց Ելք խմբակցության ղեկավար Նիկոլ Փաշինյանը՝ անդրադառնալով հարցին, թե արդյոք Ելք-ը հրաժարվել է ԵԱՏՄ-ից դուրս գալու իր պահանջից:
Փաշինյանն ընդգծեց, որ խոսքն այստեղ Ելք խմբակցության դիրքորոշման մասին չէ, այլ խոսքը ՀՀ պոտենցիալ նոր կառավարության մասին է.
«ԵԱՏՄ-ից դուրս գալու խնդիր չի դրվելու, բայց դա, ինչպես ասել եմ արդեն, չի նշանակում, թե ԵԱՏՄ-ում խնդիրներ չկան», - ընդգծեց նա:
Շարունակելով պոտենցիալ կառավարության թեման և անդրադառնալով իր գործընկեր Արարատ Միրզոյանի հայտարարությանը, որ ԱԻ նախարար Դավիթ Տոնոյանը կարող է լավ պաշտպանության նախարարի թեկնածու լինել, Փաշինյանն ասաց, որ այս պահին կառավարության ապագա կազմին վերաբերող քննարկումներ չեն եղել.
«Հիմա մեր խնդիրը համերաշխ, նորմալ աշխատանքային մթնոլորտի ձևավորումն է»,- շեշտեց նա:
Փաշինյանը հստակեցրեց նաև մեկ, ոչ պակաս կարևոր հարց.
«Մենք լիարժեք սատարում ենք Լեռնային Ղարաբաղի իշխանություններին», - ասաց նա՝ արձագանքելով հարցին, թե հնարավոր է, որ ներհայաստանյան ժողովրդական ալիքը տարածվի նաև Արցախում իշխանափոխության պահանջով:
Ինչ վերաբերում է վերջին օրերին ադրբեջանական զինուժի ակտիվացմանը շփման գծում, Փաշինյանն ասաց, որ Ադրբեջանի դիրքորոշումը ոչ կառուցողական է և այդ պայմաններում, երբ Ադրբեջանից հնչում են Երևանը գրավելու հայտարարություններ, հայկական կողմը պետք է հետևողական ուժեղացնի բանակն ու բանակի մարտական ոգին: Ըստ նրա՝ դա է ճանապարհը Ադրբեջանին կառուցողական դաշտ բերելու համար:
Բացի այս, ղարաբաղյան հակամարտության հարցում էլ դեռ հստակեցումներ պետք է արվեն.
«Ադրբեջանի ներկայիս դիրքորոշման շարունակվելու դեպքում, ԵԱՀԿ Մինսկի խումբը պետք է նպաստի, որ Ադրբեջանը վերջ տա իր ագրեսիվ հռետորաբանությանն ու վերադառնա կառուցողական դաշտ»,- ասաց թավշյա հեղափոխության առաջնորդը։
Փաշինյանի գլխավոր ուղերձը հետևյալն է.
«Իմ՝ վարչապետ ընտրվելու դեպքում երկրում ամբողջական օրինականություն կհաստատվի»:
Նշենք, որ այս պահին նա հանդիպում է անցկացնում «Ծառուկյան» խմբակցության պատգամավորների հետ: Սակայն խմբակցության ղեկավար Գագիկ Ծառուկյանը հանդիպմանը չի մասնակցում:
