Ալլահշուքյուր Փաշազադեն կոչ է արել բոլոր մահմեդականներին միավորվել հանուն Ղարաբաղի

Կովկասի մահմեդականների վարչության նախագահ Ալլահշուքյուր Փաշազադեն կոչ է արել բոլոր մահմեդականներին միավորվել հանուն Ղարաբաղի: Այս մասին նա հայտարարել է Ստամբուլում ընթացող միջազգային կոնֆերանսի ժամանակ:

«Եվրոպայի և Արևմուտքի պետությունները երկակի ստանդարտներ են կիրառում մահմեդական պետություններում տեղի ունեցող իրադարձություններին: Ի՞նչ արդարության մասին կարող է խոսք լինել: Ադրբեջանական հողերը պատկանում են ադրբեջանցի ժողովրդին: Մենք կոչ ենք անում ամբողջ մահմեդական աշխարհին միավորվել ղարաբաղյան հակամարտության կարգավորման համար», - AZE հաղորդմամբ ասել է Փաշազադեն: 

Նա նաև ընդգծել է, որ մահմեդական աշխարհը ենթարկվում է խտրականության ու նույնականացվում ահաբեկչության հետ: 

Հիշեցնենք, որ սեպտեմբերի 8-ին ամենայն Հայոց կաթողիկոս Գարեգին Երկրորդի, Համայն Ռուսիո պատրիարք Կիրիլի հետ կայացած հանդիպմանը Ալահշուքյուր Փաշազադեն այլ հայտարարություններով հանդես եկավ: Մոսկվայում կայացած եռակողմ հանդիպման արդյունքում ընդունված համատեղ հայտարարության մեջ մասնավորապես ասված էր, որ հակամարտող կողմերի երիտասարդները պետք է դաստիարակվեն որպես հարևաններ:

«Համոզված ենք, որ տարաձայնությունները կարելի է հաղթահարել՝ հենվելով բարիդրացիության սկզբունքների և ավանդական կրոնների կողմից քարոզվող բարոյական արժեքների ՝ բարության, մերձավորի նկատմամբ սիրո, փոխադարձ ներողամտության և բարեգթության վրա»: