Գագիկ Ծառուկյանը չի բացառում, որ կսատարեն ՀՀԿ նախագահի թեկնածուին

«Բարգավաճ Հայաստան» կուսակցության առաջնորդ Գագիկ Ծառուկյանը չի բացառում, որ «Ծառուկյան» դաշինքը սատարի Հանրապետական կուսակցության նախագահի թեկնածուին:

ԱԺ-ում լրագրողների հետ ճեպազրույցում այս հարցին կուսակցապետը պատասխանեց մասնավորապես հետևյալը. «Ամեն ինչ հնարավոր է, բայց այսօր մենք չգիտենք, թե թեկնածուն ով է: Ժողովուրդը իրավունք է տվել Հանրապետական կուսակցությանը առանց մեզ որոշում կայացնելու, ներկացնելու և ընտրելու, ինչի՞ մասին է խոսքը»,- ասաց նա:

Այս նույն ասվածի մեջ է տեղավորվում նաև հարցի պատասխանը, թե ինչու «Ծառուկյան» դաշինքը նախագահի թեկնածու չի առաջադրում և չի պատրաստվում սատարել «Ելք»-ի նախագահի թեկնածուին: Ըստ Գագիկ Ծառուկյանի՝ ժողովուրդը որոշեց, այնպես որ առաջադրելու ու մնացածի իրավունքն էլ ոչ թե իրենցն է, կամ «Ելք»-ինը, այլ ՀՀԿ-ինը:

Հարցին՝ հնարավո՞ր է նաև ՀՀԿ-ի հետ կոալիցիա կազմեն, Գագիկ Ծառուկյանն ասաց, որ ինքը եթե-ներով չի խոսում, իսկ կոնկրետ այդ հարցի շուրջ քննարկում չի եղել:

Նշենք, որ Հանրապետական կուսակցության ներկայացուցիչները այս շաբաթ արդեն կսկսեն նախագահի թեկնածուի քննարկումները, իսկ նախագահին ԱԺ-ն կընտրի, ամենայն հավանականությամբ, մարտի 2-ին: