Ի՞նչ ռազմական ակնկալիքներ ունի ՀՀ-ն Իսրայելից. մեկնաբանում է Նալբանդյանը
Սպառազինությունների առևտուրը բանջարեղենի առևտուր չէ և նմանատիպ առևտուրը միշտ իր սև կողմն ունի, որը կարող է հանգեցնել որոշ բացասական հետևանքների: Այս մասին Իսրայելի հանրային հեռուստատեսությանը տված հարցազրույցում հայտարարել է ՀՀ ԱԳ նախարար Էդվարդ Նալբանդյանը՝ մեկնաբանելով Իսրայել-Ադրբեջան սպառազինությունների առքուվաճառքի խոշոր գործարքները:
Լրագրողը Նալբանդյանին հարց է ուղղել, թե որո՞նք են Հայաստանի սպասելիքները Իսրայելից ռազմական օգնության կամ ռազմական արտահանումների առումով, քանի որ դա խնդիր է հանդիսացել երկու երկրների միջև:
«Սպառազինությունների առևտուրը բանջարեղենի առևտուր չէ և նմանատիպ առևտուրը միշտ իր սև կողմն ունի, որը կարող է հանգեցնել որոշ բացասական հետևանքների: Հայաստանի և Իսրայելի հարաբերություններում կարևորն այն է, որ մենք որևէ հարց քննարկելու համար արգելք չունենք, նույնիսկ զգայուն հարցերը մենք անկաշկանդ քննարկում ենք և փորձում լուծումներ գտնել», - պատասխանել է Նալբանդյանը:
Հավելյալ ճշտող հարցին՝ թե ինչպիսի՞ն են Հայաստանի սպասումներն Իսրայելից այս խնդրի վերաբերյալ, Նալբանդյանը պատասխանել է շատ կարճ ու դիվանագիտական ոճով. «Ասացի այն, ինչ կարող էի ասել Ձեզ: Մենք բաց և շատ դրական քննարկումներ ենք անցկացնում»:
Ավելի վաղ իսրայելական «Maariv» և «Jerusalem Post» պարբերականների հրապարակած տեղեկությունների համաձայն, Իսրայելի պաշտպանական գերատեսչությունն արգելափակել է Aeronautics ընկերության Orbitier ռազմական հարվածային անօդաչու սարքերի ենթադրյալ մատակարարումն Ադրբեջան։
Հիշեցնենք` Aeronautics-ը այն ընկերությունն է, որի շուրջ սկանդալ էր ծագել, երբ կասկածներ էին առաջացել, որ ընկերության ներկայացուցիչները իրենց արտադրած Orbiter 1K հարվածային անօդաչու սարքերը Ադրբեջանին վաճառելու նպատակով համաձայնել են դրանց փորձարկում իրականացնել մարտական պայմաններում` հայկական դիրքերի ուղղությամբ:
Այնուհետեւ Իսրայելի պաշտպանության նախարարությունը պաշտոնապես հետաննություն սկսեց եւ արգելափակեց Ադրբեջանին հարվածային անօդաչու թռչող սարքեր մատակարարող Aeronautics Defence System ընկերության գործարքները:
Էդվարդ Նալբանդյանը նաև անդրադարձել է Հայաստանի և Իրանի միջև հարաբերություններին և Մերձավոր Արևելքում և տարածաշրջանում Իրանի դերին։ Հայաստանի արտգործնախարարը նշել է, որ Հայաստանն ունի լավ հարաբերություններ հարևան Իրանի հետ, որի հետ համագործակցում է տարբեր ոլորտներում, մինչդեռ մյուս երկու հարևան երկրների՝ Թուրքիայի և Ադրբեջանի հետ մեր երկիրն ունի փակ սահմաններ.
«Իրանը, Վրաստանը այն երկու հարևաններն են, որոնց հետ մենք ունենք ոչ միայն բնականոն հարաբերություններ, այլ նաև լավ համագործակցություն։ Եվ մենք ջանքեր ենք գործադրում մեր երկկողմ փոխգործակցությունն ու գործընկերությունը զարգացնելու ուղղությամբ։ Եվ ես չեմ կարծում, որ դա խոչընդոտ է Իսրայելի հետ մեր երկկողմ հարաբերություններում, ինչպես որ խոչընդոտ չեն Իսրայելի հարաբերությունները Հայաստանի հարևան որևէ երկրի հետ»,- շեշտել է նա։
