Նավթադոլարային թմրադեղի վրա նստածները զրոյացնում են ԵԽԽՎ հեղինակությունը: Այս մասին Ստրասբուրգում ընթացող ԵԽԽՎ լիագումար նիսռում հայտարարել է հայկական պատվիրակության անդամ Նաիրա Զոհրաբյանը:
Պատվիրակը ելույթն ունեցել է կանոնադրական փոփոխությունների քննարկման շրջանակում, որոնք հնարավորություն կտան կանխարգելել լոբբիստների եւ կոռուպմացված պատգամավորների գործունեությունը։ Նաիրա Զոհրաբյանը կոչ է արել ԵԽԽՎ-ից վտարել Ադրբեջանի բոլոր եվրոպացի լոբբիստներին, նշելով, որ նավթադոլարային թմրադեղի վրա նստածները զրոյացնում են Եվրոպայի Խորհրդի հեղինակությունը։ Նաև առաջարկել է բոլոր այն զեկույցները, որոնք քննարկվում են հանձնաժողովներում, կամ ներառված են լիագումար նիստի օրակարգ եւ որոնց հեղինակները այս կամ այն կոռուպցիոն պատմության հերոսներից են, չեղարկել եւ նշանակել նոր զեկուցողներ։
«Ցավում եմ, որ ստիպված ենք ժողովրդավարության այս ամբիոնում քննարկել կոռուպցիայի, կոռումպացված լոբբիստների եւ բարոյականության ու էթիկայի հետ լրջուգույն խնդիրներ ունեցողների ձեռքը օրենքով բռնելու հարցը, սակայն սա է իրականությունն ու համաեվրոպական վերջին կոռուպցիոն սկանդալը՝ 3 միլիարդ դոլարի սեւ լվացքի, դրա ուղղակի ապացույցն է։ Հարգարժան զեկուցողը միանգամայն իրավացի է, երբ արձանագրում է, որ Վեհաժողովի ներկա եւ նախկին անդամների հետ կապված կոռուպցիոն հայտարարությունները կասկածի տակ են դնում Վեհաժողովի հեղինակությունը։ Ավելին, այս կամ այն երկրի դոլարային թմրասեղին նստած բազմաթիվ գործիչների թեթեւ ձեռքով մեր Վեհաժողովում ընդունվում կամ տապալվում են զեկույցներ՝ կախված նավթադոլարային պատվիրատուի քաղաքական ճաշակից։ Նավթադոլարային թմրադեղի վրա նստածները զրոյացնում են ԵԽԽՎ հեղինակությունը»,- հայտարարել է նա:
Հայ պատվիրակի խոսքով՝ պետք է խստագույնս կանոնակարգել նաեւ, այսպես կոչված, «ազատ ստեղծագործողի» կարգավիճակ ունեցող լոբբիստների աշխատանքը, ովքեր որոշակի կարգավիճակ ստանալով Վեհաժողովում, լծվում են Եվրոպայի Խորհրդի փտախտ հանդիսացող վարչակարգերի լոբբինգին, աշխատելով ընդդեմ ժողովրդավարության եւ մարդու իրավունքների։ Ըստ Զոհրաբյանի՝ նմանօրինակ վարձկան-լեգիոներներ, ԵԽԽՎ նախկին պատգամավորներ, այսօր հայտնի սկանդալային լվացքի եւ խավիարային դիվանագիտության ակտիվ դերակատարներից են, եւ նրանց մուտքը Վեհաժողով պետք է արգելվի։
Նա նաև նշել է, որ կանոնադրական այն փոփոխությունները, որ առաջարկում է զեկուցողը՝ կոռուպցիոներների եւ լոբբիստների դոլարային թթվածինը փակելու համար, իհարկե, ընդունելի են։ Այն, ինչ առաջարկում է կոռուպցիայի դեմ պայքարի «ԳՐԵԿՈ» խումբը եւս միանշանակ պետք է ընդունել։ Ու չնայած ինքը չի հավատում սեփական խիղճը վաճառքի հանածի բարոյական վերափոխմանը, ինչպես դժվար է հավատում, որ նավթային կռապաշտը կարող է երբեւէ պաշտպանել արդարությունը, սակայն առաջարկվող բոլոր մեխանիզմները՝ բռնելու կոռուպցիայի թմրասեղի վրա նստածի ձեռքը, պետք է ընդունել։
«Ես առաջարկում եմ նաեւ բոլոր այն զեկույցները, որոնք քննարկվում են հանձնաժողովներում, կամ ներառված են լիագումար նիստի օրակարգ եւ որոնց հեղինակները այս կամ այն կոռուպցիոն պատմության հերոսներից են, չեղարկել եւ նշանակել նոր զեկուցողներ։ Անկախ դատավորներից կազմված հետաքննող մարմինը, որն իր հաշվետվությունը Վեհաժողովին կներկայացնի այս տարվա ավարտին, լուրջ աշխատանք ունի անելու։ Հարցի արժեքը շատ բարձր է. մենք իրավունք չունենք թույլ տալու, որ Եվրոպայի Խորհրդի Խորհրդարանական Վեհաժողովը վերածվի շուկայի, որտեղ ամեն ինչ հնարավոր է գնել ու վաճառել»,- հավելել է Նաիրա Զոհրաբյանը։
