VERELQ-ը ներկայացնում է հայաստանյան մամուլի ամենաուշագրավ հրապարակումները:
«168 ժամ» թերթը գրում է. ««168 ժամ»-ը զրուցել է Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի առաջին փոխնախագահ, ԱՊՀ երկրների ինստիտուտի ղեկավար Կոնստանտին Զատուլինի հետ:
-Պարոն Զատուլին, «Ելք» դաշինքը հանդես է եկել ԵԱՏՄ-ում Հայաստանի անդամակցությունը դադարեցնելու նախաձեռնությամբ: Խորհրդարանական խմբակցությունն առաջարկել է հանձնաժողով ստեղծել՝ քննարկելու համար ԵԱՏՄ-ի բոլոր դրական ու բացասական կողմերը, նախատեսվում են նաև լսումներ: ԵԱՏՄ-ում ինչպե՞ս են վերաբերվում այս գործընթացին:
-Ես ամբողջ ԵԱՏՄ-ի համար պատասխան տալ չեմ կարող, այդ հարցը կարելի է ուղղել նաև Հայաստանի պաշտոնյաներին, քանի որ ձեր երկիրն էլ ԵԱՏՄ անդամ է: Ինչ վերաբերում է «Ելք» դաշինքի ցանքերին՝ կազմաքանդելու բոլոր այն կառույցները, որոնց Հայաստանն անդամակցում է, կամ առնվազն, չգիտեմ ինչպես անվանել «Արմսիտ» թե «Երևանսիտ», ինչպես «Բրեքսիտն» էին կոչում, ապա, իմ կարծիքով, եթե մի քիչ օբյեկտիվ լինենք՝ «Ելքի» ներկայացուցիչները, բացի միությունից դուրս գալուց, որևէ այլ բան չեն առաջարկում: Այսինքն՝ Հայաստանի համար ո՞րն է այլընտրանքն այսօր այն ամենին, ինչ կապված է եվրասիական ինտեգրման հետ: Եվրոատլանտյան ինտեգրացիա՞ն է: Դե ինչ, Հայաստանն արդեն եղել է ԵՄ-ի հետ ասոցիացման և ազատ առևտրի գոտու ստեղծման մասին պայմանագրի ստորագրման ուղու վրա, բայց հետաձգել է այդ պայմանագրի կնքումը: Որքանով ինձ հայտնի է, մոտակա ժամնակներում Հայաստանը դժվար թե կարող է հուսալ դառնալ ԵՄ անդամ: Այնպես, ինչպես շատերը՝ սկսած Ուկրաինայից: Եվ ես կասկածում եմ, որ կարող է հույս ունենալ անդամակցել ՆԱՏՕ-ին, առավել ևս հուսալ, որ ՆԱՏՕ-ն կպաշտպանի Հայաստանի սահմանները և հանդես կգա նրա տարածքային ամբողջականության երաշխավորի դերում, եթե Հայաստանը հայտնվի վտանգի առջև:
Մենք պարզ պատկերացնում ենք, թե որտեղից է գալիս Հայաստանի պատմական սպառնալիքը, և Հայաստանի տարածքում Ռուսաստանի ռազմաքաղաքական ներկայությունը կոչված է սառը ջուր լցնել նրանց վրա, ով կցանկանա հակահայկական հիստերիա բարձրացնել ու դավեր նյութել Հայաստանի դեմ: Եթե «Ելք» դաշինքն ինչ-որ ավելի լավ բան առաջարկի Հայաստանի համար, ապա, կարծում եմ, այդ լսումների մեջ ինչ-որ իմաստ կլինի: Հակառակ դեպքում՝ դա պարզապես ցանկություն է ցուցադրել ԵԱՏՄ-ում Հայաստանի անդամակցության հանդեպ սեփական անհարգալից վերաբերմունքը և սեփական բացասական վերաբերմունքը Ռուսաստանի հանդեպ՝ որպես այսօրվա դրությամբ ԵԱՏՄ-ի հիմնական նախաձեռնող և մասնակից: Այսինքն, պարզ ասած, դա ցանկություն է խզել Ռուսաստանի և Հայաստանի միջև գոյություն ունեցող սերտ կապերը: Բայց եթե «Ելք» դաշինքը կայանալու այլ հնարավորություն չունի, քան Հերոստրատի նման ինչ-որ բան հրկիզելը, ապա այդ դեպքում էլեկտորալ տեսանկյունից նրանք շատ ճիշտ են վարվում»:
«Ժամանակ»-ը գրում է. ««Ժամանակ»-ի տեղեկություններով՝ Վրաստանի փոխվարչապետ, արտաքին գործերի նախարար Միխեիլ Ջանելիձեն սեպտեմբերի 11-ին ՀՀ ԱԳ նախարար Էդվարդ Նալբանդյանի և նախագահ Սերժ Սարգսյանի հետ հանդիպման ընթացքում քննարկել է նաև Վրաստանում Հայաստանի նոր դեսպանի նշանակման հարցը: Մեր հավաստի տեղեկություններով՝ վրաց ԱԳ նախարարը խոստացել է օրերս ուղարկել Կովկաս ինստիտուտի տնօրենի տեղակալ, քաղաքագետ Սերգեյ Մինասյանի Վրաստանում ՀՀ արտակարգ և լիազոր դեսպանի ագրեմանը»:
«Հրապարակ»-ը գրում է. «Մեր տեղեկություններով՝ Արցախում կառավարման համակարգի փոփոխություններից և կառավարության հրաժարականից հետո կառուցվածքային և կադրային մեծ փոփոխություններ են սպասվում։ Ընդ որում՝ փոփոխություններ են սպասվում բոլոր ուղղություններում, բոլոր ոլորտներում: Նախարարների գրեթե կեսը փոխվելու է, փոփոխություններ կլինեն նաև շրջանային ղեկավարների կազմում։ Մեր աղբյուրները հայտնում են, որ առաջիկայում փոխվելու են գյուղատնտեսության, կրթության, էկոնոմիկայի նախարարները, Մարտակերտի, Ասկերանի շրջանների ղեկավարները»:
«Ժամանակ»-ը գրում է. «Թերթի տեղեկություններով՝ Վերահսկիչ պալատի նախկին նախագահ Իշխան Զաքարյանը հավակնում է Ազգային անվտանգության խորհրդի քարտուղարի պաշտոնին, որը թափուր է այս տարվա մայիսի 2-ից, երբ խորհրդի քարտուղար Յուրի Խաչատուրովը նշանակվեց ՀԱՊԿ գլխավոր քարտուղար: Իշխան Զաքարյանը հույս ունի, որ եթե «Ծառուկյան» դաշինքը մաս կազմի իշխող կոալիցիային, իր նշանակումը ևս իրականություն կդառնա»:
