Մինչև 2036 թվականը Հայաստանում էլեկտրաէներգիայի սակագինն անփոփոխ կմնա, եթե...

Մինչև 2036 թվականը Հայաստանում էլեկտրաէներգիայի սակագինն անփոփոխ կմնա: Սա է ենթադրում Էներգետիկ զարգացման հայեցակարգը, որը կառավարության հաստատմանը կներկայացվի մինչև սեպտեմբեր: Այս մասին կառավարության այսօրվա նիստում հայտարարեց էներգետիկ ենթակառուցվածքների և բնական պաշարների նախարար Աշոտ Մանուկյանը:

Նախարարի խոսքով, իրենք արդեն երեք անգամ հայեցակարգը ներկայացրել են կառավարություն, բայց հետ են ստացել որոշ դիտողություններով:

«Այսօր մենք, կարծես թե, որևէ խնդիր չունենք, բացառությամբ նրա, որ քննարկման փուլում է Կայունացման հիմնադրամի ստեղծման հարցը, որը հնարավորություն կտա պահպանել սակագները ներկայիս մակարդակի վրա»,- ասաց Աշոտ Մանուկյանը՝ համաձայնելով, որ էլեկտրաէնեգիայի սակագները մինչև 2036 պահպանելը ամբիցիոզ ծրագիր է: Բայց ներկայումս իրենք փնտրում են միջոցներ, որ ստեղծվի Կայունացման հինադրամը, ինչն էլ հույս կտա, որ առաջիկա տարիներին սակագների վրա գոնե արտաքին ազդեցությունը հնարավոր կլինի չեզոքացնել: