Կանխվել է ադրբեջանական աղի, կաթի փոշու և թեյի ներկրումը Հայաստան

Հայաստանի կարգավորիչը կանխել է ադրբեջանական ծագման կաթի փոշու և աղի ներմուծման փորձը երկիր։ Այս մասին Ազգային Ժողովում լրագրողների հետ ճեպազրույցում ասել է ՀՀ պետեկամուտների կոմիտեի նախագահ Վարդան Հարությունյանը:

Նրա խոսքով, մաքսային կառույցները ներմուծվող ապրանքների նկատմամբ խիստ վերահսկողություն են իրականացնում, ինչն էլ թույլ է տվել կանխել ադրբեջանական ծագման մի շարք ապրանքների, այդ թվում և կաթի փոշու, թեյի և աղի ներմուծման փորձերը.

«Արտադրանքն ուղարկվել է փորձաքննության, մեղավորները կպատժվեն»,- հավաստիացրել է ՊԵԿ նախագահը:

Հիշեցնենք, ապրիլին Հայաստան ապօրինի ճանապարհով ադրբեջանական խնձոր էր ներկրվել, որը նաև հայկական շուկայում վաճառվում էր: ԱԱԾ-ն պարզել էր, որ ադրբեջանական ծագման խնձորի ապօրինի ներկրումներին աջակցել են նաև ՀՀ ԿԱ ՊԵԿ աշխատակիցները, որոնք կաշառք են ստացել: Նշված հանցավոր արարքները կատարելու համար 4 քաղաքացիների և ՊԵԿ 4 պաշտոնյաների մեղադրանքներ են առաջադրվել: